Dështon vaksina gjermane “CureVac”, jo efikase tek të moshuarit

Kompania farmaceutike “CureVac” ka humbur objektivin për vaksinën e saj: në një studim të Fazës 3, ajo tregoi efikasitet të barabartë me 47%, shumë e ulët për standardin e cilësisë për një vaksinë kundër koronavirusit, që Organizata Botërore e Shëndetësisë ka vendosur në 70%.

Kompania “CureVac” ka selinë në Tübingen, Gjermani dhe vaksina e saj është bërë me teknologjinë e ARN-së (mARN), e cila është gjithashtu pas suksesit të vaksinave efektive 95% të Pfizer dhe Moderna.

Lajmi bëri që stoku gjerman të rrëzohej në tregun e aksioneve dhe gjithashtu krijoi shqetësim në Evropë, sepse priteshin rezultate të mira nga një vaksinë ARN, aq sa Bashkimi Evropian kishte parashikuar deri në 405 milionë doza “CureVac”.

Jo efektive për popullatën e moshuar

Ishte e njëjta kompani që komunikoi rezultatet paraprake që vijnë nga një analizë e ndërmjetme bazuar në 134 raste Covid në studim me rreth 40,000 vullnetarë në Evropë dhe Amerikën Latine.

124 tamponë pozitive u sekuencuan dhe 57% e rasteve u zbulua se shkaktoheshin nga të ashtuquajturat 'variante shqetësuese' më shumë të transmetueshme. Sidoqoftë, midis varianteve të identifikuara nuk kishte “Beta” dhe “Delta” (Afrika e Jugut dhe Indiani), të cilat janë ato që "minojnë" më shumë vaksinat.

Një fakt tjetër zhgënjyes, i paraqitur nga kompania, është se rezultatet e ndërmjetme sugjerojnë se vaksina është efektive tek pjesëmarrësit më të rinj të studimit, por nuk është treguar e efektshme tek ata mbi moshën 60 vjeç, grupmosha më e rrezikuar nga Covid i rëndë.

"Do të ketë edhe 80 raste në analizën përfundimtare dhe efikasiteti i përgjithshëm i vaksinës mund të ndryshojë, - tha CEO i “CureVac”, Franz-Werner Haas. - por ndërsa shpresonim për një rezultat të përkohshëm më të fortë, ne e pranojmë që qasja e një efektiviteti të lartë në këtë shumëllojshmëri të varianteve të papara të virusit, është sfiduese”. Të dhënat në dispozicion iu komunikuan Agjencisë Evropiane të Barnave (EMA).

Fati për të pasur vaksina efektive

“CureVac”, mbështetur nga investitorët Dietmar Hopp, nga “Gates Foundation” dhe “GlaxoSmithKline”, si dhe qeveria gjermane, synoi të prodhonte deri në 300 milionë doza të vaksinës në vitin 2021 dhe deri në 1 miliard doza në 2022-in.

Në këtë lloj vaksine, ARN-ja dërguese futet në qeliza për t'i bërë ato të prodhojnë proteinën “S” (‘spike’-thumb). Mënyra në të cilën dizajnohet ARN-ja, mund të ndikojë në një seri hapash në këtë proces me efekte në cilësinë e përgjigjes imune të ngjallur.

Dizajni i mirë i vaksinave është jashtëzakonisht i komplikuar. Faktorët e përfshirë janë të shumtë, sepse nuk ka siguri sa i gatshëm është sistemi ynë imunitar për t’i përftuar.

Përshtati: Gazeta “Si”

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.