Gazeta Si – Kilian Mbape shqetëson PSG-në në prag të Championsit. Sulmuesi doli nga fusha në minutën e 20-të të ndeshjes së fundit me Montpeljenë në kampionat, duke ngritur alarmin 13 ditë para sfidës së 1/8-ve me Bajernin e Mynihut.
Pas një përplasjeje me Leo Leroi të Montpeljesë, Mbape preku disa herë kofshën e majtë dhe pak minuta më pas kërkoi zëvendësim, duke ia lënë vendin Ekitike.
Gjendja e tij do të vlerësohet me detaje, por për momentin drejtuesit e klubit parisien janë në ankth, sepse bëhet fjalë për një nga lojtarët më të rëndësishëm të skuadrës. Situata është bërë më shqetësuese, sepse në minutën e 31-të la fushën edhe Serxhio Ramos, pas një përplasjeje kokë më kokë me Stefi Mavididi.
Nëse të dy këta lojtarë do të mungonin ndaj Bajernit, do të ishte një humbje e madhe. Te PSG Championsi është një nga objektivat kryesorë dhe stafi teknik shpreson të rikuperojë në kohë Mbapenë dhe Ramosin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.