.png)
Marash Kumbulla mund ta quajë të mbyllur sezonin e tij. Mbrojtësi shqiptar u dëmtua në fitoren kundër Andorrës, por ekzaminimet mjekësore evidentuan një problem edhe më të rëndë se mendohej. Një problem i madh mbi të gjitha për Fonsecan në funksion të sprintit përfundimtar të Romës në kampionat. Dëmtimi në gju i pësuar nga Kumbulla, në ndeshjen e parë të kombëtares shqiptare për kualifikueset e Botërorit do ta ndalojë 20 vjecarin të jetë në dispozicion të trajnerit të verdhekuqve deri në fund të këtij sezoni. Kontrollet instrumentale zbuluan një dëmtim të meniskut të jashtëm që do ta detyrojë lojtarin të qëndrojë jashtë për tre muaj.
“Dëmtimi ndodhi në pjesën e dytë të lojës. Unë ndjeva diçka, por muskujt ishin të nxehtë dhe arrita ta përfundoja ndeshjen. Në dhomat e zhveshjes më pas e ndjeva që isha dëmtuar”, tregonte Kumbulla kur mbërriti në aeroportin e Romës.
Duke pasur parasysh situatën në gju, për momentin stafi mjekësor i verdhekuqve duket se ka zgjedhur terapinë konservatore, duke përjashtuar operacionin, por për Kumbullën sezoni ka mbaruar dhe kjo është e sigurtë. Një lajm i keq për Fonsecan, i cili do të duhet të bëjë pa shqiptarin deri në fund të kampionatit, duke mbetur me lojtarët të numëruar në repartin e prapavijës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
