.png)
Pak kohë më parë janë ndërruar trajnerët e kombëtareve të moshave, që kanë pasur rezultate të dobëta periudhën e fundit. Nevil Dede i Kombëtares U-19 dhe Elvin Beqiri i Kombëtares U-17, kanë publikuar sot listat e lojtarëve të grumbulluar për ndeshje debutuese në stolin kuqezi. Si te lista e Dedes, ashtu edhe tek ajo e Beqirit, bie në sy numri i madh i lojtarëve që vijë nga kategoritë e ndryshme të futbollit shqiptar. Më parë ka pasur një tendencë për të afruar te kombëtaret e moshave sa më shumë lojtarë që vijnë nga kampionate të huaja, ndërsa tani duket se është hapur një cikël i ri.
Nevil Dede, përveç lojtarëve të thirrur nga ekipe të kampionatit tonë si Partizani, Tirana, Skënderbeu, Vllaznia, Flamurtari e Laçi, ka marrë edhe 5 lojtarë të Shkëndijës së Tetovës, duke ia “rrëmbyer” Maqedonisë.
Edhe trajneri i U-17-ës, Elvin Beqiri, ka grumbulluar një numër të madh lojtarësh të kampionatit tonë. Ekipi i tij është pjesëmarrës në trofeun “Mercedes Benz” që zhvillohet në Turqi në datat 14-17 janar. Në këtë kompeticion marrin pjesë 8 kombëtare moshash, të ndara në 2 grupe. Kuqezinjtë 17-vjeçarë bëjnë pjesë në Grupin B, ku janë edhe Spanja, Rusia dhe Maqedonia. Skuadra të tjera pjesëmarrëse janë Anglia, Turqia, Azerbajxhani dhe Moldavia.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
