Gazeta Si – ‘Djajtë e kuq’ humbasin ndeshjen e parë të kampionatit në ‘Old Trafford’. Brajtoni fiton 1-2 dhe prish debutimin e ten Hag, ndërsa Kristiano Ronaldo e nis nga stoli.
Nga Brajtoni te Brajtoni. Nga pika më e ulët e erës ‘Rangnik’ (4-0) te humbja e parë e Erik ten Hag në stolin e Mançester Junajtid. Brajtoni mbetet ‘macja e zezë’ e Junajtid me një tjetër paraqitje të madhe në ‘Old Trafford’.
Ten Hag befason që në fillim, Ronaldo në stol dhe Eriksen 9 false. Një zgjedhje që funksionoi vetëm për pak minuta, me Junajtid agresiv në fillim, por të brishtë në mbrojtje.
Një gabim i Dalot i jep mundësinë Trosard t’i afrohet golit, pastaj Uellbek shfaqet rrezikshëm. Brajtoni godet në kundërsulm në minutën e 30-të me Gros, që shënon i pambuluar në zonë. Skuadra vendëse tronditet dhe pas 9 minutash pëson edhe të dytin, sërish me lojtarin gjerman.
Në pjesën e dytë ten Hag hedh në fushë Kristiano Ronaldon, që rizgjon ‘Old Trafford’-m. Rashford humb dy raste të mira, ndërsa në minutën e 68-të MekKalister shkakton një autogol.
Junajtid sulmon fort në kërkim të barazimit, por topi nuk shkon në rrjetë dhe gjithçka mbyllet 1-2. Trajneri holandez debuton me humbje, siç ka ndodhur edhe me patriotin e tij van Gal. Tani kritikat do të fillojnë direkt për të. Fytyra e Kristiano Ronaldos në stol i thotë të gjitha.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.