“Na bënë të vdekur, në çdo pikëpamje. Nuk na kishte ndodhur kurrë më parë të ishim në vështirësi kaq të madhe”. Ky është sinqeriteti i trajnerit të Atalantës, Gasperinit, pas humbjes 4-0 në Zagreb ndaj Dinamos. Një humbje e thellë, që nuk lë asnjë dyshim për mënyrën si shkoi loja. Ndeshjen e ardhshme Atalanta e ka në “San Siro” ndaj Shakhtar Donetsk dhe nëse nuk fiton, e ka të pamundur ta kalojë grupin.
Atalanta vuajti emocionet e debutimit në Champions dhe pika më e dobët e saj ishte mbrojtja. Berat Gjimshiti, si në kampionat, ishte titullar edhe në Champions. I vetmi kuqezi që luajti në xhiron e parë të ndeshjeve në grup për kompeticionin më prestigjioz të klubeve, pasi Hysaj ishte i dëmtuar. Por paraqitja e qendërmbrojtësit ishte nga më të dobëtat, ashtu si e gjithë repartit të prapavijës në fakt. Gjimshiti gaboi në rastin e golit të parë të kroatëve, kur humbi nga sytë sulmuesin Leovac. Ai është vlerësuar me notën 4 dhe më tepër se për lojën, është kritikuar për mënyrën si mori kartonin e verdhë, si një fillestar, sipas shtypit sportiv italian. Një ndeshje për t’u harruar për futbollistin e Kombëtares shqiptare.
![](https://gazetasi.al/wp-content/uploads/2019/09/djim.jpg)
Atalanta nuk shfaqi asgjë nga vlerat e saj në stadiumin “Maksimir”. Skuadra bergamaske i bëri të gjithë për vete me futbollin e saj gjatë sezonit të fundit, por me Championsin, të paktën me atë që u pa në ndeshjen e parë, duket se nuk ka asnjë lidhje. Debutimi i Atalantës në kompeticionin më të rëndësishëm për klubet europiane ishte vërtet një horror.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.