Italia ka ashpërsuar masat për qytetarët shqiptarë, duke vendosur mbylljen e kufijve si pasojë e rritjes së numrit të rasteve të reja me Covid 19.
Sipas mediave italiane, Shqipëria del nga lista D e Ministrisë italiane të Shëndetësisë sa u takon vendeve të sigurta dhe hyn në listën E dhe ky vendim do të hyjë në fuqi prej datës 26 tetor 2021 (nesër) deri në 15 dhjetor 2021.
Mësohet se hyrja nga vendi ynë drejt Italisë dhe e personave që kanë udhëtuar gjatë 14 ditëve të fundit në Shqipëri, do të bëhet vetëm për motive pune, shëndeti, studimi, urgjencë absolute apo rikthim në banesën e rezidencës. Që do të thotë se nuk ka më vizita turistike.
Dekreti i ri, i publikuar në fletoren zyrtare dhe i cituar nga shtypi italian, nënkupton se automatikisht Shqipëria, nga lista D e vendeve që lejon lëvizjen e qytetarëve të kalojnë duke prezantuar një tampon, me vendimin e ri, hyn në listën e vendeve E, që nënkupton se hyrja në territorin italian do të bëhet vetëm për motive të caktuara.
Ministria italiane e Shëndetësisë i ka ndarë vendet nga të cilat mund të udhëtosh dhe prej të cilave mund të hysh në Itali, në 5 zona: Zona A, Zona B, Zona C, Zona D dhe Zona E. Siç edhe mund të kuptohet Zona E (lexo këtu kriteret për vendet e Zonës E) është lista më e pasigurtë e vendeve për Covid-19. Nga Italia drejt këtyre vendeve mund të udhëtosh vetëm për arsye pune, arsye shëndetësore, studime dhe urgjencë të pashmangshme. Ndërsa për të hyrë nga vendet e Zonës E në Itali, kërkohen të gjitha testet, apo pasaporta e gjelbër, që nuk je i prekur nga Covid-19. Gjithashtu është e nevojshme edhe karantina.
Por nëse për Shqipërinë janë ashpërsuar masat për shkak të rritjes së infektimeve me koronavirus, për Kosovën nuk do të aplikohet një masë e tillë.
Kosova ka pasur një ulje të ndjeshme në javët e fundit të numrit të vdekjeve dhe rasteve të reja me Covid 19, ndaj Italia e ka hequr nga lista e vendeve “problematike”.
Të njëjtin fat si Shqipëria, do të kenë edhe vendet e tjera të Ballkanit, si Bosnjë Hercegovina, Serbia, Maqedonia e Veriut, por edhe shtete si Armenia, Azerbajxhani dhe Brunei.
Përjashtim është bërë vetëm për qytetarët e Izraelit, të cilët mund të udhëtojnë drejt Italisë nëse paraqesin ‘Green Pass’-in ose tamponin negativ për Covid 19.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.