Gazeta si - Mbrëmja e sotme sjell dy sfidat e tjera çerekfinale të Ligës së Kampionëve. Në fushë zbresin kampionët në fuqi të Çelsit, që presin Realin e Madridit në Londër, kurse Bajerni i Mynihut ndeshet me surprizën Vilarreal, që eliminoi Juventusin.
Reali i trajnerit Karlo Ançeloti e ka në “xhep” titullin në Spanjë dhe tani synon t’i shkojë deri në fund edhe Ligës së Kampionëve. Pasi eliminuan PSG-në, madrilenët kanë më shumë besim se do të shtojnë një tjetër trofe me veshë të mëdhenj në palmaresin e tyre të pasur.
Isko, Hazard dhe Joviç janë mungesat e spanjollëve për ndeshjen e sotme. Në anën tjetër, Çelsi është i plotë, por kuptohet që situata nuk është ajo më e mira. Pas sanksioneve të qeverisë angleze ndaj Abramoviçit, Çelsi ka dalë në shitje dhe duhet të gjejë një blerës sa më parë. Skuadra në fushë është munduar të bëjë më të mirën, edhe pse nuk është shumë e qetë.
Bajerni pati më shumë fat në short, të paktën në letër. Gjermanët ndeshen me Vilarrealin, surprizën e çerekfinaleve dhe që tregoi se mund të bëjë keq, duke eliminuar një skuadër me shumë përvojë europiane, siç është Juventusi. Megjithatë, gjasat janë që aventura në Champions e “nëndetëses” të mbyllet në çerekfinale, sepse Bajerni nuk fal kollaj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.