.png)
Tregjet financiare ndërkombëtare reaguan me optimizëm të hënën pas njoftimit të presidentit amerikan Donald Trump se Shtetet e Bashkuara dhe Irani kanë arritur një marrëveshje për t’i dhënë fund konfliktit mes dy vendeve. Lajmi ka sjellë një rritje të ndjeshme të bursave në Azi dhe Europë, ndërsa çmimet e naftës kanë shënuar rënie të fortë pas njoftimit për rihapjen e Ngushticës së Hormuzit.
Nafta amerikane ra me afro 5%, duke zbritur në rreth 80.8 dollarë për fuçi, ndërsa Brent, standardi ndërkombëtar i referencës, humbi rreth 4%, duke rënë nën 84 dollarë për fuçi. Për ekonomitë europiane, të cilat varen në masë të madhe nga importet energjetike, ulja e çmimeve të naftës përkthehet në presion më të ulët inflacionist dhe në perspektivë më të favorshme për rritjen ekonomike.
Kontratat në Wall Street u ngjitën përpara hapjes së tregut. Kontratat e indeksit Dow Jones u rritën me 1.02%, ato të S&P 500 me 1.24%, ndërsa Nasdaq 100 fitoi gati 2%, duke reflektuar pritshmëri pozitive nga investitorët amerikanë.
Në Azi, reagimi ishte edhe më i fortë. Indeksi japonez Nikkei 225 arriti një rekord të ri brenda ditës dhe e mbylli seancën me një rritje prej 5%, ndërsa Kospi i Koresë së Jugut u ngjit me 5.2%. Fitime shënuan edhe tregjet e Hong Kongut, Kinës dhe Indisë, ndërsa aksionet e kompanive teknologjike u udhëhoqën nga rritja mbi 12% e SoftBank në Japoni.
Sipas deklaratave të bëra gjatë fundjavës, marrëveshja parashikon ndërprerjen e operacioneve ushtarake mes SHBA-së dhe Iranit. Kryeministri i Pakistanit, Shehbaz Sharif, tha se ceremonia zyrtare e nënshkrimit do të zhvillohet të premten në Zvicër, duke theksuar se Islamabadi ka luajtur rol ndërmjetësues në negociata.
Një nga elementët më të rëndësishëm të marrëveshjes është rihapja e Ngushticës së Hormuzit, korridorit detar përmes të cilit kalon një pjesë e konsiderueshme e furnizimeve botërore me naftë. Trump deklaroi se kalimi do të rihapet pa vendosjen e tarifave, një zhvillim që uli menjëherë tensionet në tregjet energjetike.
Bursat europiane e nisën javën me fitime të gjera. Indeksi pan-europian Stoxx 600 u rrit me 1.2%, ndërsa CAC 40 në Francë dhe DAX në Gjermani fituan përkatësisht 1.9% dhe 1.8%. Investitorët favorizuan sektorët që përfitojnë nga energjia më e lirë dhe nga zbutja e pasigurisë gjeopolitike.
Kompanitë automobilistike europiane si Renault, Stellantis, Ferrari dhe BMW shënuan rritje të forta, ndërsa aksionet e linjave ajrore dhe operatorëve turistikë u ngjitën ndjeshëm, të mbështetura nga pritshmëritë për ulje të kostove të karburantit.
Në kahun e kundërt u gjend sektori energjetik. Gjigantë si TotalEnergies, BP dhe Shell regjistruan humbje, pasi investitorët parashikojnë të ardhura më të ulëta në një mjedis me çmime më të dobëta të naftës.
Në Shtetet e Bashkuara, klima pozitive në tregje u mbështet edhe nga performanca e fortë e SpaceX pas debutimit të saj në bursë javën e kaluar. Aksionet e kompanisë u rritën me më shumë se 19% ditën e parë të tregtimit, duke e çuar vlerën e saj në mbi 2 trilionë dollarë.
Megjithatë, vëmendja e investitorëve do të mbetet e përqendruar edhe te zhvillimet ekonomike në SHBA. Këtë javë priten të dhëna të reja mbi tregun e banesave dhe shitjet me pakicë, ndërsa Rezerva Federale do të zhvillojë mbledhjen e saj të radhës për politikën monetare. Tregjet vlerësojnë se ka më shumë se 98% gjasa që banka qendrore amerikane të mbajë të pandryshuara normat e interesit.
Nëse marrëveshja mes Uashingtonit dhe Teheranit formalizohet sipas planit dhe zbatohet në praktikë, ajo mund të shënojë jo vetëm një zbutje të tensioneve në Lindjen e Mesme, por edhe një lehtësim të rëndësishëm për ekonominë globale, përmes stabilizimit të tregut të energjisë dhe rikthimit të besimit në tregjet financiare.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje