.png)
Gazeta Si - Tre ushtarakët e arrestuar në Zall Herr të shtunën për kultivim kanabisi, janë lënë në burg nga Gjykata e Tiranës.
Gjatë seancës gjyqësore, ata nuk kanë pranuar autorësinë e veprës penale. Sipas burimeve, ushtarakët kanë theksuar se 140 hektarë tokë është e pamundur për t’u kontrolluar e gjitha.
Mbrojtja pretendoi se pa akt ekspertimi ata nuk mund të akuzohen për kultivim të lëndëve narkotike. Po ashtu, kanë pretenduar se kanë "lajmëruar eprorët e tyre për territorin e thyer dhe për pamundësinë për ta kontrolluar"
Gramoz Mullai, 52 vjeç, me detyrë Shef Seksioni i Sigurisë; Rustem Koçi, 25 vjeç, me detyrë Specialist për Zbulimin dhe Gentian Zhurda, 45 vjeç, akuzohen për shpërdorim detyre.
Ata u arrestuan pas një operacioni të policisë ku u asgjesuan 125 rrënjë kanabis, ndërsa 4 ushtarakë të tjerë janë proceduar penalisht në lidhje me këtë ngjarje.
Pas zbulimit të parcelës me kanabis, për herë të parë në një repart ushtarak, ministri i Mbrojtjes Niko Peleshi njoftoi pezullimin nga ushtria të personave të përfshirë.
Ndërsa ministri i Brendshëm Taulant Balla përgëzoi operacionin e policisë, duke premtuar goditje të tjera kundër kultivimit të kanabisit në ditët e ardhshme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
