Mesazhi i Edi Ramës në Forumin e Prespës shënjestroi në dy drejtime. Në ta parin i adresohej Brukselit për dështim në mbajtjen e premtimeve të dhëna për integrimin e Shqipërisë dhe Maqedonisë së Veriut dhe i dyti i adresohej Prishtinës për bllokimin e nismës rajonale të minishengenit Ballkanit.
“Nuk ndjehemi të frustruar, apo në depresion, ne jemi mirë. Nëse do të mund të masim depresionin, ata janë më të depresionuar se ne. Ne nuk po lutemi, nuk po u themi “Ej shikoni ne jemi këtu, po sillemi mirë”, na pranoni”. Jo ne jemi mirë, ne po rritemi, po zhvillohemi”, tha Rama.
Mesazhi i dytë dhe ku Kryeministri u përqëndrua më fort i përqëndrohej Kosovës për refuzimin në pjesëmarrjen e nismës së Minishengenit Ballkanik.
“Mund të bashkëpunojmë në rajon, mundemi që bashkërisht t’i bëjmë presion që punët të na shkojnë më mirë për përmirësimin e ekonomive tona, të hapësirës më të madhe për sipërmarrësit tanë, për të rinjtë tanë. Të izoluar dhe me shpinë nga njëri-tjetri jemi tepër të vegjël, por të bashkuar jemi në masë mjaftueshëm të mëdhenj”, tha ai.
Në këtë pjesë ironizoi me burokracitë e Bashkimit Europian.
“Falë Zotit Europa nuk mund të na bllokojë dhe tregojë se çfarë të bëjmë në këtë rajon dhe nga ana tjetër ne mund që me veprimet tona t’ua lehtësojmë jetën njerëzve që jetojnë këtu. Pse duhet të presim të jemi vende anëtare të BE që të bëjmë tregti pa barriera mes qytetarëve, pa pritje. Pse të presim BE që të kemi lëvizje të lirë të njerëzve, qarkullim të kapitalit dhe mallrave, një sportel në kufij që t’i shndërrojmë të hapur dhe të lirë?! Këtë mund ta bëjmë edhe vetë dhe duhet të lëvizim në këtë drejtim”, vijoi ai.
Sipas Ramës, kushdo që mendon se të ndarë në Ballkan mund të tërheqë investime të mëdha gabohet dhe ftoi që konfliktet tradicionale, si në rastin e Kosovës me Serbinë të lihen mënjanë për të mos mbajtur peng zhvillimin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.