Zëvendëskryeministri Erion Braçe ka zgjedhur një kohë simbolike për të (fund majin e viti ’96 kur u fut në politikë) për të shkruar shumëçka për reformën në drejtësi, politikën e pistë siç e quan ai dhe Partinë Socialiste. Në një postim të gjatë në Facebook, Braçe shpjegon se reforma në Drejtësi është angazhimi më i madh i Partisë Socialiste në 30 vite.
Braçe shkruan se, partnerë të PS-së në këtë reformë kanë qënë SHBA e BE si dhe shqiptarët. Sepse me këtë kauzë, sipas tij, PS-ja fitoi edhe zgjedhjet e 2017-ës.
Duke folur për ecurinë e reformës, Braçe i fillon përgjegjësitë që më ngjarjen e Gërdecit.
“Eshte tallëse, fyese, neveritëse, ta shpif, është pa rast të ngjashëm në Evropë që kryeministri e ministrat përgjegjës në vrasjet e Gërdecit e Bulevardit, qëndruan në detyrë, nuk u dorëhoqën e akoma nuk kanë marrë përgjegjësi, nuk kanë kërkuar as falje, nuk u pyetën, hetuan e gjykuan, por dominojnë politikën, përdorin statusin e tyre politik për të bindur prokurorë e gjykatës ende në sistem që t’i mbrojnë dhe, mbrojnë nga reforma në drejtësi çdo prokuror e gjykatës të varur prej tyre, të korruptuar e që ju shërben”, - shkruan ai.
Jo më kot e prek këtë temë, duke dashur të kalojë tek problemi aktual.
“Sulmojnë reformën cep e me cep, qoftë duke qeshur për të fshehur frikën e me fjalë pa kuptim siç bën njëri, qoftë duke puthur Kushtetutën siç gjahtari çiften dygrykëshe siç bën tjetri, qoftë barbarisht, haptazi e dhunshëm siç kumbari që i bën bashkë në zgjidhjen totale për ta: Destabilizimin e rendit kushtetues në vend!”.
Sipas tij, ajo që po ndodh këto ditë është beteja e fundit, finale, kundër reformës në drejtësi.
“Betejat e vogla kanë ndodhur gjithnjë në përpjekje për të kushtëzuar reformën, vendimet për të, votën me ngjarje të tjera ku është dashur prezenca e tyre; I kanë humbur! Bllokimi ka ndodhur por është mundur!..”.
Sipas tij, kundër reformës “i lidh një nevojë personale, individuale e disa njerëzve bërë sa një grusht për të njëjtin hall”
“Duan prokurorët e gjykatësit e tyre, nuk rrojnë dot si politikanë pa ta! Pa ta janë pa pushtet, pa status...”
Braçe garanton se nga PS nuk ka lëkundje sa i përket zbatimit të reformës në drejtësi.
“PS është e vetmja fuqi politike në këtë vend me reformën në drejtësi; Sulmohet, goditet për ta përçarë, ndarë për reformën tani, me synim që ky të jetë fundi i reformës, fundi i përpjekjes për drejtësi të pastër, të pavarur nga politikanët, një pakicë biznesmenesh, kriminelët, të barabartë”, shkruan ai.
Dhe ja ku Braçe bëhet më i drejtpërdrejtë, duke drejtuar gishtin.
“Presidenti i Republikës që po synon këtë, synon fundin e reformës, por edhe fundin e PS! Do të humbin edhe një herë më shumë; Kanë bllokuar por janë mundur, e kanë provuar edhe një herë më shumë por kanë dështuar, nuk kanë cënuar dot shtyllat bazike të reformës, nuk kanë mbrojtur dot asnjë prokuror e gjykatës nga rrethi i tyre politik apo i korrupsionit, nuk kanë mundur të rimarrin të drejtën për të emëruar drejtësinë e re!“.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.