Gazeta Si - Mijëra besimtarë të krishterë në Shqipëri kanë kremtuar Krishtlindjen e parë pa kufizime nga pandemia e Covid-19.
Mëngjesin e kësaj të diele po mbahet mesha e besimtarëve ortodoksë në katedralen "Ngjallja e Krishtit" në kryeqytet. Meshën e mban kryepeshkopi Anastas Janullatos.
Ndërkohë që të shtunën në mbrëmje, në Katedralen e “Shën Palit”, kreu i kryedioqezës Mitropolitane Tiranë-Durrës Arjan Dodaj drejtoi meshën për besimtarët katolikë.
Mesha e Krishtlindjes për besimtarët katolikë nisi rreth orës 23:00 në Katedralen e Shën Palit dhe vazhdoi deri pas mesnate.
Kreu i Kishës Katolike Imzot Arjan Dodaj, pati edhe një mesazh solidariteti me të pamundurit, por edhe një reflektim për pasojat e luftës.
“Pamundësia për shumë familje të varfra që të kenë kushte më dinjitoze dhe shpeshherë një klimë mosbesimi e ushqyer nga egozimi dhe korrupsioni, të pranojmë Jezusin foshnje, si të vetmin dhe të gjithanshmin ilaç për jetën tonë që ka fjalë të jetës dhe jetës së pasosur”, - ishte mesazhi i Imzot Arjan Dodajt.
Qytetarët luten për më shumë mirëqenie, dashuri e paqe mes tyre.
Krishtlindja është festa e dytë më e rëndësishme në kalendarin e besimtarëve katolikë dhe ortodoksë, pas Pashkës.
Sipas besimit ortodoks dhe katolik, në këtë ditë ka ardhur në jetë nga Virgjerësha Mari, shpëtimtari Jezu Krishti, biri i Perëndisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.