Nga Gazeta 'SI'- Treguesi i besimit në ekonomi ka shënuar rënie me 1.9% në muajin shtator, krahasuar me muajin gusht, duke arritur pikën më të të ulët që nga 2021-shi.
Sipas Bankës së Shqipërisë, rënia është ndikuar nga përkeqësimi i besimit në sektorin e ndërtimit, shërbimeve dhe tek konsumatorët. Besimi në industri dhe tregti ka pësuar rritje të lehtë.
Treguesi i besimit konsumator ra me 3.1% në shtator, ndikuar nga pritjet për përkeqësim të situatës ekonomike në vend dhe rënie të fuqisë së tyre blerëse.
Besimi në ndërtim pati rënien më të lartë gjatë shtatorit, me 5.3%, ndikuar nga pesimizmi për aktivitetin ndërtues. Bizneset në këtë sektor presin dhe rënie të punësimit dhe çmimeve. Nga ana tjetër, vlerësimi i tyre për kontratat porositëse ishte në rritje në këtë muaj.
Treguesi i besimit në shërbime, ra me 3% gjatë shtatorit, ndikuar nga rënia e të dy komponentëve përbërës, vlerësimet për ecurinë aktuale të aktivitetit të tyre dhe vlerësimet për kërkesën. Pritjet e bizneseve të shërbimeve për çmimet në të ardhmen janë rritur.
Besimi në industri dhe tregti shënoi rritje gjatë shtatorit, me nga 1%. Bizneset në industri patën rritje të kërkesës së jashtme dhe të brendshme. Ata presin rritje çmimesh të mëtejshme. Pritshmëritë e tyre për prodhimin janë në rënie.
Bizneset tregtare kanë vlerësuar me optimizëm ecurinë aktuale të biznesit, ndërkohë që pritjet për punësimin në muajt e ardhshëm mbetën pothuajse të pandryshuara. Pritjet për çmimet që do të vendosin në të ardhmen kanë pësuar rritje.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.