.png)
Nga Gazeta 'Si'-Kryeministrja serbe, Ana Bërnabiç deklaroi se ruajtja e Kosovës si pjesë e Serbisë është pika e parë në listën e planit 10-pikësh të Partisë Progresive Serbe.
“Plani 10-pikësh është premtimi ynë – çfarë ende duam të bëjmë deri në vitin 2027 në 10 pika. Pika e parë është ruajtja e Kosovës dhe Metohisë brenda Republikës së Serbisë”, tha Bërnabiç.
Ajo shtoi se në krye të listës është drejtimi i një politike të jashtme të pavarur, e udhëhequr nga një Serbi e pavarur, e cila vendos e vetme për të ardhmen e saj.
“Kështu ka qenë deri në vitin 2012, gjithçka ka ndryshuar. Nga viti 2012 duam që populli i Serbisë të vendosë dhe të pajtohemi me popullin tonë, e jo me disa zyrtarë të tjerë të huaj dhe njerëz të fuqishëm”, theksoi kryeministrja.
Ndër të tjera, Bërnabiç nënvizoi se një nga pikat e planit është neutraliteti ushtarak.
“Ruajtja e neutralitetit tonë ushtarak, forcimi i mëtejshëm i kapaciteteve tona të sigurisë, i ushtrisë sonë, por edhe i të gjitha shërbimeve të sigurisë”, u shpreh Bërnabiç ndërsa shtoi se një pikë tjetër e planit është që paga mesatare në Serbi deri në vitin 2027 të jetë së paku 1400 euro.
"Kjo është ajo që garantojmë dhe jemi në rrugën e duhur. Paga mesatare në Serbi në këtë muaj dhjetor do të arrijë afërsisht 830 euro, tha ajo.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
