.png)
Lulzim Basha u është rikthyer takimeve me biznesin e vogël në Tiranë, ku thotë se ka vënë re përkeqësimin e gjendjes ekonomike të tyre dhe vuri theksin se ndihma financiare e ofruar nga Qeveria është krejtësisht e pamjaftueshme.
Kreu i PD-së u ndal në njësinë bashkiake numër 3, ku në takimet që pati me pronarë të bizneseve të vogla, këta të fundit janë shprehur se ndihma financiare e Qeverisë është e pamjaftueshme, taksat janë rritur dhe faturat e ujit dhe energjisë elektrike po ashtu.
Përfaqësues të këtyre bizneseve kërkuan gjithashtu që të hiqet kufizimi i fundjavës, pasi thonë se vetëm në fundjavë kanë xhirot më të mëdha. Basha tha se kriza po thellohet dhe ngriti nevojën e rikthimit sa më parë në normalitet.
“Duhet t’i kthehemi një orë e më parë normalitetit dhe më e rëndësishmja është t’ju mbështesim ju, se po nuk mbështetëm biznesin do të shkatërrojmë ekonominë, do të shkatërrojmë gjithçka. Këta e kanë mendjen vetëm të zhvasin e të marrin, sikur nuk do të ketë të nesërme. Kështu që ne duhet të bëhemi të gjithë bashkë të mos e lejojmë këtë”, tha kreu i PD-së.
Kjo ndalesë me biznesin e vogël përforcoi edhe më tej bindjen e Lulzim Bashës. Ai thotë se biznesi dhe ekonomia nuk mbahen dot në këmbë, as me urdhrat e Facebook-ut të Edi Ramës, as me gënjeshtrat e tij.
“Paketa e parë ishte një gënjeshtër. Një ndihmë qesharake, që nuk mbulon as taksat apo tarifat e rritura lokale, as faturat e larta afrofe të energjisë dhe të ujit. Paketa e dytë ishte gjithashtu një gënjeshtër, më pak se rroga minimale për 2 muaj e gjysëm mbyllje e detyruar e biznesit dhe bashkë me të, mbyllja e vendit të punës”, deklaron kreu i opozitës.
Kryedemokrati bën një panoramë të zymtë, jo vetëm në Tiranë.
“Është njësoj keq kudo. Në Tiranë, në Durrës, në Shkodër, në Vlorë, në Korçë. Në çdo cep të Shqipërisë bizneset po mbyllen, papunësia po rritet dhe numri i familjeve në varfëri është shtuar”, thotë ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
