Edi Rama dhe Lulzim Basha e zhvendosën në rrjetet sociale përplasjen e tyre për ndryshimet kushtetuese të miratuara nga Kuvendi. Këtu, kreu i Partisë Demokratike u tregua më i ashpër se reagimi fillestar pas miratimit të këtyre ndryshimeve.
Basha nënkuptoi se Rama po e çonte vendin drejt një konflikti me hedhjen ne erë të marrëveshjeve të 14 janarit dhe 5 qershorit, por u zotua se opozita do të sigurohet që kjo kosto të përplaset vetëm mbi të dhe jo mbi qytetarët.
“Koston e konfliktit të krijuar me hedhjen në erë të marrëveshjes së 5 Qershorit dhe 14 Janarit, do ta mbash vetëm ti personalisht Edi Rama”, thotë ai.
Kreu i PD-së madje i tregon edhe burgun Kryeministrit.
“Nëse mendon se me konfliktin e krijuar dhe me prishjen e stabilitetit demokratik të vendit, do të marrësh garanci për kokën tënde dhe të hajdutëve që të rrethojnë, po ta them prerë dhe shkurt: Vendi yt pas zgjedhjeve të reja është në burg, atje ku shkon çdo individ që me dashje kryen një krim kundër vendit dhe qytetarëve të tij”, vijon ai.
Basha e mbyll reagimin duke thënë se për opozitën do të vijojnë të mbeten në plan të parë qytetarët dhe ajo nuk do të bëhet pjesë e lojërave të Edi Ramës dhe krimit, që sipas kreut të PD-së, e drejton atë prej 22 vitesh në politikë.
Ndryshe nga përgjigjia e rezervuar për Ilir Metën në përgjigjen ndaj Lulzim Bashës, Edi Rama shfaqet më i përmbajtur. Ai e cilëson si të nxituar reagimin e kreut të PD-së.
“Lulzim Basha, reagimi yt ndaj ftesës sime për të vijuar punën bashkarisht dhe reflektuar në Ligjin Zgjedhor risitë kushtetuese është shumë i nxituar! Kërcënimet për konflikt e për fatura kostosh personale, tregojnë humbje të busullës! Në emër të shqiptarëve vendos Parlamentit”, thotë ai.
Rama i kërkon Bashës që të mos humbasë me kohë dhe të ulet në tryezë për ndryshimet në Kodin Zgjedhor pas votës në Kuvend për hapjen e listave.
“Le të vazhdojmë punën e nisur. 5 qershorin aty e ke, top në Ligjin Zgjedhor, ku tani duhet të integrojmë edhe 30 korrikun! Ta bëjmë së bashku e mos harro, s'presim dot gjatë!”, shkruan Rama.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.