.png)
Nga Gazeta 'SI' - Shqipëria është përzgjedhur si destinacioni më i mirë në Europë për vitin 2023, sipas Barometrit të Turizmit në OKB.
OKB tregon se krahasuar me kohën para pandemisë, turistët e huaj që kanë vizituar Shqipërinë në 2023-shin, janë shtuar me 40%. Shqipëria renditet e katërta në rang botëror, pas ishujve Turks & Kaikos, Katarit dhe Arabisë Saudite.
Për lajmin ka reaguar edhe kreu i qeverisë Edi Rama i cili thotë se kjo është një arritje për të cilën do duhet të jemi shumë krenar.
“Hej miq dhe udhëtarë! Barometri i Turizmit i OKB-së sapo ka bërë të ditur se Shqipëria është destinacioni më i mirë në Evropë për vitin 2023! Jemi të emocionuar dhe krenarë që na vlerësojnë peizazhet tona të bukura, kulturën e pasur dhe mikpritjen e ngrohtë. Pavarësisht nëse jeni duke kërkuar për aventura në malet tona madhështore, relaksim në plazhet tona të pacenuara ose një udhëtim nëpër rrugët tona historike, Shqipëria ka diçka për të gjithë. Ejani dhe shikoni vetë pse të gjithë po flasin për Shqipërinë. Le të krijojmë kujtime së bashku që do të zgjasin një jetë! Mezi pres t'ju mirëpres të gjithëve”, shkruan Rama.
Për vitin që lamë pas në Shqipërinë kanë hyrë 10 milionë turistë, një shifër rekord që ishte përtej parashikimeve të qeverisë. Ndërkohë, tashmë Shqipëria synon për vitin e ardhshëm 15 mln turistë. Gjithësesi Shqipëria kategorizohet ende në profilin "low-cost" dhe akoma nuk është tërheqëse për turistët elitarë. Po ashtu, turizmi në vendin tonë karakterizohet nga sezonalizmi, që do të thotë është kryesisht veror apo dimëror.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
