.png)
Vetëm 6 minuta iu deshën Nedim Bajramit për t’i shënuar Lacios, duke zhbllokuar rezultatin me penallti në atë barazim emocionues 3-3 në “Olimpico”. Ai gol ka bërë që interesimi i Lacios për këtë futbollist të shtohet.
Igli Tare, drejtori sportiv i Lacios, po përgatit ofertën për mesfushorin e Empolit dhe Kombëtares shqiptare, që nuk do të lëvizë në merkaton e dimrit, por në qershor. Bajrami ka impresionuar deri tani, duke joshur edhe Taren, i cili synon të fitojë konkurrencën me klubet e tjera.
Edhe Sasuolo është në gjurmët e fantazistit kuqezi, por Bajrami duket më shumë i orientuar për të pranuar një ofertë të Lacios. Ai nuk është nxituar asnjëherë për të lënë Empolin, pret ofertën e duhur dhe në Romë mund të gjejë sfidën që kërkon. Ditët e ardhshme pritet që dy klubet të kontaktojnë dhe të fillojnë të flasin për shifrat dhe formulën e transferimit të mundshëm.
Bajrami ka lindur në Zyrih, por ka zgjedhur të luajë për Shqipërinë. Me fanellën kuqezi numëron deri tani 6 ndeshje. “Vendosa me zemër, kur më kontaktuan, nuk hezitova”, - ka thënë vetë lojtari për “La Gazzetta dello Sport”. Empoli e mori nga Grasshopersi dhe menjëherë Bajrami u bë protagonist me të në Serinë B dhe tani në Serinë A.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
