Gazeta Si – Babai i të riut Lear Kurti, i cili ka humbur jetën në rrethana të paqarta pas ndalimit të policisë në Komisariatin nr 3, hedh akuza të rënda nga punonjësve të policisë.
Artur Isai thotë se 32-vjeçarin, të cilin e ka marrë vetëm 2 vjeç nga Shtëpia e Fëmijës për ta birësuar dhe marrë në shtëpinë e tij, e kanë mbytur.
I interesuar për të parë trupin e pajetë të të birit, ai është në pritje të një përgjigjeje nga autoritetet e morgut të Tiranës për ekspertizën mjeko-ligjore, e cila do të zbardhë dhe shkakun e vërtetë të vdekjes.
“Nuk e kam parë trupin e djalit. Kam qenë gjithë natën jashtë morgut dhe sot dhe nuk më kanë dhënë asnjë lloj shpjegimi”, – pohon ai për Top Channel.
Pyetjes nëse ka pasur kontakt nga autoritetet, ai i përgjigjet: “Cilat autoritete? Ato që e kanë mbytur?! Ku ka këtu shtet. Gjeta ata të AMP-së aty, më thanë nuk dimë gjë, kur të bëhen ato… nga ora 10 ose 11 do të të themi. Nuk më kanë dhënë asnjë përgjigje”.
Isai thekson se djali i tij ka qenë në punë të tij dhe mohon që ai të ketë pasur probleme shëndetësore.
“Ai ka qenë në rrugë të Zotit. Nuk ka qenë asnjë person i rrezikshëm për ta trajtuar në ato lloj formash. Probleme shëndetësore? Jo asgjë. Djali ka qenë 2 metra si luan”, – shton babai.
Sipas Agjencisë së Mbikëqyrjes Policore, në momentin kur është shoqëruar në ambientet e Komisariatit, Kurti ka filluar të shfaqë probleme shëndetësore.
Në këtë moment është lajmëruar ambulanca, por për shkak se është vonuar, efektivët e kanë dërguar me makinën e policisë me urgjencë në spital, ku dhe ndërroi jetë.
Megjithatë vdekja e tij vijon të mbetet e paqartë, pasi dyshohet se mjekët e Spitalit të Traumës nuk e kanë ekzaminuar kur kanë konstatuar se i riu ka mbërritur pa puls, duke e përcjellë në morgun e Tiranës.
Nëse versioni nga Trauma do të ishte i vërtetë, atëherë ai bie ndesh me atë të policisë, sipas së cilës Kurti u dërgua në spital pasi shfaqi probleme dhe ndërroi jetë aty.
Agjencia e Mbikëqyrjes Policore njoftoi se nën drejtimin e Prokurorisë është ngritur një grup hetimor, i cili po kryen veprimet e para hetimore për sqarimin e plotë të rrethanave të ngjarjes. Sakaq pritet edhe ekspertiza mjekoligjore për të përcaktuar shkaqet e vërteta të vdekjes së Lear Kurtit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
