Gazeta Si - Suida Kuka, s’do ta kishte zbuluar pakon me tritol në gomën e parë të makinës, nëse në celularin e saj nuk do të kishte mbërritur një mesazh paralajmërues.
Sipas burimeve hetimore, Drejtoresha e Operatorit të Kujdesit Shëndetësor në Shkodër, është njoftuar në telefon me sms për një shpërthim të mundshëm eksplozivi.
Mësohet se 28-vjeçarja ka marrë një mesazh nga një numër i panjohur, për të cilin ajo ka deklaruar në polici se nuk e njeh.
Menjëherë pas këtij mesazhi, Kuka ka njoftuar në telefon forcat e policisë së Shkodrës, të cilët kanë rrethuar zonën dhe evakuuan të gjithë institucionin.
Pas deklaratës së saj, Prokuroria dhe Policia e Shkodrës, po hetojnë edhe në lidhje me tabulatet telefonike dhe po kërkohet gjurmimi i numrit që dërgoi mesazhin.
Në dëshminë e saj, Suida Kuka ka deklaruar se nuk ka konflikte me persona te tjerë, ndërkohë që edhe sa i takon detyrës si drejtuese e institucionit, nuk ka pasur konflikte apo presione.
Sipas policisë, në pakon e mbështjellë me një qese të vogël, ndodheshin rreth 200 gramë lëndë plasëse në gomën e parë automjetit.
Eksplozivi ka qenë i lidhur me sistem të telekomanduar përmes një telefoni dhe policia e aktivizoi përmes një shpërthimi të kontrolluar.
Kamerat e sigurisë kanë fiksuar një person që lëvizte me motor, i cili hedh qesen me tritol në gomën e parë të automjetit, i cili ishte i parkuar pranë institucionit të drejtuar nga e reja.
Ende nuk ka një pistë zyrtare hetimi nga ana e policisë së Shkodrës, megjithatë burime në rrugë jo zyrtare, shprehen se po hetohet në lidhje me pozicionin e punës së 28-vjeçares.
Policia është duke verifikuar vendimet e Kukës gjatë detyrës së saj si drejtore e Operatorit të Kujdesit Shëndetësor Shkodër, për të zbuluar nëse gjatë kësaj periudhe ka qenë apo jo dikush i prekur prej kësaj veprimtarie që mund të çojë deri në vendosjen e një bombe poshtë makinës.
Po ashtu, një pistë tjetër është dhe ajo e ndonjë gjobe të papaguar. Mësohet se babai i saj është biznesmen dhe dyshohet se ndonjë prej grupeve kriminale të Shkodrës t’i ketë vënë gjobë të atit të saj dhe pasi ai nuk e ka paguar, ta kenë paralajmëruar përmes së bijës.
Kohët e fundit kanë qenë të shumta rastet e vendosjes së eksplozivit në Shkodër.
Vetëm gjatë muajve të parë të këtij viti, janë regjistruar 5 raste shpërthimi, ndërsa shënjestër e tyre kanë qenë edhe punonjës të policisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.