.png)
Një 40 vjeçar, i identifikuar si Bledar Birçaj, është ekzekutuar në një atentat me armë zjarri të hënën në Vlorë. Sipas informacioneve policore, mësohet se ngjarja ka ndodhur në vendin e quajtur Bishti i Kalldrëmit, në lagjen “Hajro Çakërri”.
Policia thotë se në rrethana të paqarta, është qëlluar në drejtim të një automjeti, ndaj drejtuesit të tij, i cili si pasojë e plagëve të marra është transportuar në Spitalin e Vlorës, ku dhe ka ndërruar jetë.
Bëhet fjalë për një atentat, pasi automjeti që ka qenë shënjestrën e plumbave është qëlluar disa herë në pjesën e xhamit kryesor.
Grupi hetimor nën drejtimin e Prokurorisë ndodhet nē vendngjarje dhe po punon për zbardhjen e plotë të rrethanave të ngjarjes. Policia është vënë në ndjekje të autorit. Bledar Birçaj, i ekzekutuar sot në Vlorë, nuk ishte një emër i panjohur për drejtësinë.
Në 21 dhjetor 2010, Birçaj së bashku me vëllain e tij, Elton Birçaj, kanë dhunuar barbarisht ish-juristin e hipotekës së Vlorës me inicialet F.H.
Për këtë ngjarje dy vëllezërit janë proceduar në gjendje të lirë. Shkak i kësaj ngjarje është bërë, problemet që ata kanë pasur me dokumentacionin në një pronë që ndodhet në qytetin e Vlorës.
Në janar të vitit 2011 ai u arrestua në Vlorë, pasi dyshohej për kryerjen e veprës penale të “Vrasjes me paramendim” e kryer në bashkëpunim mbetur në tentativë; “prodhimit dhe mbajtjes pa leje të armëve luftarake dhe municioneve”; si dhe “Shkatërrim prone”.
Ai ka qëndruar fillimisht në qeli në masën e “arrestit në burg” 45 ditor dhe më pas në 9 mars 2011, Gjykata e Vlorës ka caktuar masën e sigurisë “arrest në burg” pa afat.
Ndërkohë, në prill, masa ndaj tij ndryshoi nga Gjykata e Vlorës nga “arrest në burg”, me masën e sigurimit “detyrim paraqitje në policinë gjyqësore” dhe masën detyruese “ndalim të daljes jashtë shtetit” deri në përfundim të hetimeve. Por në korrik 2011, u vendos pushimi i hetimit penal në ngarkim të Bldedar Birçajt, duke u lënë i lirë.
Për qëndrimin në burg për një periudhë 122 ditore, Birçaj ka përfituar dëmshpërblim financiar prej 2 milionë e 760 mijë lekë të vjetra.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
