.png)
Sulmi me tritol i vendosur ndaj një objekti biznesi dy ditë më parë në Durrës, rezulton se është i deputetit të mazhorancës, Lefter Koka. Por ajo që ka habitur më shumë hetuesit, është mekanizmi i vendosjes së tritolit në kantinën e pijeve.
Mësohet se autorët kanë përdorur një dron të mbushur me ekskploziv, i cili ka shpërthyer duke u lëshuar nga lartësia përmes mjetit-fluturues. Burime policore bëjnë me dije se nga shpërthimi i lëndës plasëse ka pasur vetëm dëme të vogla materiale.
Bëhet fjalë për një godinë 3-katëshe që përdorej si biznes, në pronësi të shtetasit J.D., por ish-ministri i Mjedisit Koka, zotëron pjesën më të madhe të aksioneve në këtë shoqëri.
Për ngjarjen, policia raportoi se ka arrestuar një të dyshuar, me inicialet G.M. Ndaj tij, Gjykata e Durrësit këtë të premte ka vendosur masën e sigurisë “arrest me burg”.
Mekanizmi i shpërthimit ka vënë në lëvizje strukturat e antiterrorit në Policinë e Shtetit, ndërsa rezulton se për herë të parë është dokumentuar një skenar i tillë.
Në pranga ka rënë edhe një person tjetër i dyshuar me inicialet A.M., por ndaj tij gjykata ka caktuar masën e sigurimit personal “detyrim paraqitje”, pasi akuzohet për shkelje të të drejtave të pronësisë industriale dhe veprime në kundërshtim të gjykatës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
