Akuzat për korrupsion në strukturat drejtuese të futbollit botëror po bëhen gjithmonë e më të shpeshta. Në pranga ka përfunduar së fundi numri 2 i FIFA-s, Ahmad Ahmad, i cili ka mbajtur edhe postin e presidentit të Konfederatës së Afrikës. Pikërisht për shkak të këtij roli ai është arrestuar, ndërkohë që nga institucioni i drejtuar nga Xhani Infantino ka pasur një komunikatë diplomatike, ku bëhet me dije se nuk ka dijeni për hetimin në fjalë.
Zëvendëspresidenti i FIFA-s, Ahmad Ahmad, akuzohet për korrupsion. Arrestimi i tij është bërë në Paris dhe vjen një ditë pas konfirmimit të Xhani Infantinos në krye të FIFA-s, në vigjilje të Kupës së Botës në futboll për femra, që starton nesër në Paris. E ka konfirmuar arrestimin e Ahmad vetë FIFA, që me një komunikatë zyrtare saktëson se gjithçka lidhet me kohën, kur ai drejtonte futbollin afrikan:
"Ahmad është marrë në pyetje nga autoritet franceze në lidhje me akuzat që i takojnë mandatit të tij si president i Konfederatës Afrikane të Futbollit. FIFA nuk ka dijeni për detajet e këtij hetimi dhe nuk mund të japë asnjë koment specifik. Do t'u kërkojmë autoriteteve franceze çdo informacion, që do të jetë i vlefshëm për hetimin që do të bëhet tashmë nga Komisioni i Etikës", - shkruhet në komunikatën e shpërndarë nga FIFA, që është maksimalisht e impenjuar për zbardhjen e ngjarjes.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.