.png)
Gazeta Si - Apeli i Posaçëm Kundër Korrupsionit dhe Krimit të Organizuar ka lënë në fuqi masën e sigurimit "arrest me burg" të caktuar nga Shkalla e Parë për Arben Dervishajn, biznesmeni që mbikëqyrte punimet i inceneratorit të Fierit.
Zëvendëspresidenti i Federatës Shqiptare të Futbollit, akuzohet se paraqiste raporte fiktive në ministritë e linjës, duke lejuar administratorët të përfitonin para për punë publike të pakryera.
Dervishaj kishte apeluar masën e GJKKO, duke kërkuar ndryshimin e saj, kërkesë që u rrëzua këtë të enjte në Apel.
Prokuroria Kundër Korrupsionit dhe Krimit të Organizuar, përfundoi disa javë më parë hetimet në lidhje me megaaferën e djegësit të Fierit dhe dërgoi në gjykatë dosjen e me 21 të pandehur, mes tyre Lefter Kokën, ish-deputetin Alqi Bllako, Arben Dervishaj.
Sipas SPAK, ka rezultuar se për këtë incenerator janë paguar 4 milionë euro, për punë që nuk janë kryer asnjëherë, ndërsa 60 milionë lekë përllogaritet dëmi i shkaktuar në buxhetin e shtetit.
Ish-deputeti Bllako në atë kohë sekretar në Ministrinë e Mjedisit akuzohet për korrupsion dhe shpërdorim detyre.
Nga hetimi i SPAK rezulton se ai në bashkëpunim me anëtarët e komisionit të dhënies së koncesionit kanë ndihmuar në favorizimin e kompanisë fituese, si dhe ka përfituar një shumë prej rreth 15 milionë lekë ryshfet.
Akuzat për korrupsioni dhe shpërdorimit të detyrës i janë komunikuar edhe ish-ministrit Lefter Koka. Dy ish-zyrtarët e lartë janë marrë të pandehur për të njëjtat akuza edhe për koncesionin e Elbasanit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
