.png)
Gazeta Si – Ndeshja miqësore mes Juventusit dhe Atletiko Madrid nuk do të zhvillohet në Tel Aviv, siç ishte programuar. Ajo është spostuar në Torino dhe do luhet të dielën me dyer të mbyllura.
Shkaku për anulimin e ndeshjes në fjalë në Tel Aviv ka të bëjë me faktin se qyteti izraelit është kërcënuar për sulm me raketa, pas përshkallëzimit ushtarak të situatës mes Izraelit dhe xhihadistëve të Rripit të Gazës.
Nisja e Juventusit ishte programuar për sot, në orën 15:00, por tani ka ardhur vendimi që ky udhëtim të anulohet. Sipas ‘As’, edhe Atletiko vendosi të mos niset për në Izrael.
Të dy klubet e kanë të nevojshëm një test para nisjes së kampionateve respektive. Mes skenarëve të ndryshëm ata zgjodhën që të ndryshojnë vendin, ku do të luhet ndeshja.
Sulmet e avionëve izraelitë në Rripin e Gazës kanë shkaktuar vdekjen e të paktën 10 personave, mes të cilëve edhe komandantit të sektorit të veriut të xhihadit islamik, Tayasir Jabari. Si kundërpërgjigje janë hedhur 70-80 raketa nga Rripi i Gazës drejt qendrës së vendit, por nuk pati viktima.
Lideri politik i organizatës islamike, Ziad Nahaleh, ka thënë se “Tel Avivi dhe të gjitha qytetet e tjera izraelite janë në shënjestër". Nga kjo deklaratë është ngritur alarmi për ndeshjen e nesërme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
