Gazeta Si – Një ditë pas sekuestrimit të vilës në Gjirin e Lalzit, oficerët e Policisë Gjyqësore kanë vijuar punën edhe këtë të martë për sekuestro preventive të të gjitha pasurive të Jamarbër Malltezit.
Ata ishin në kompleksin e banimit “Magnet” në Tiranë që është ngritur pikërisht në ish-klubin “Partizani”, privatizimi i të cilit ka çuar në burg dhëndrin e Sali Berishës.
LEXO EDHE:
– Foto/ Sekuestrohen pasuritë e Jamarbër Malltezit, 16 shtëpi dhe vila te Gjiri i Lalzit (lista)
– Malltezi lihet në burg, avokati: Standardi i provueshmërisë është shumë i ulët, po cënohet parimi i sigurisë juridike
– Privatizimi i ‘Partizanit’, GJKKO lë në burg Jamarbër Malltezin. ‘Detyrim paraqitje’ për Bektashin (foto, video)
Oficerët janë takuar me përfaqësuesit e kompanisë që i kanë njohur me vendimin e gjykatës për sekuestrimin.Malltezi gëzon 100% të aksioneve të shoqërisë “Magnet Imo” dhe 60% të kuotave të shoqërisë “Magnet Gym and Fit”. Gjithashtu ai zotëron 45% të aksioneve të kompanisë “Home Plan”.
Mesditën e së hënës Malltezit iu sekuestrua dhe vila në gjirin e Lalëzit.
Sanksionet e gjykatës janë shtrirë dhe në banka, ku janë bllokuar 6 llogari, në euro, dollarë dhe lekë. Në total u sekuestruan rreth 250 mijë euro, 29 mijë dollarë dhe 2.7 milionë lekë. Në total janë 16 pasuri të paluajtshme në emër të Jamarbër Malltezit, që do të sekuestrohen.
Mbi të rëndojnë dy akuza: “Korrupsionit pasiv” dhe “Pastrimi i produkteve të veprës penale apo veprimtarisë kriminale” në lidhje me privatizimin e ish-klubit sportiv “Partizani”.
SPAK thotë se ai ka shfrytëzuar pushtetin e ish-kryeministrit dhe ka arritur të marrë përfitimet e parregullta si: privatizimi i terreneve dhe objekteve sportive, gjë që ka çuar në kryerje ndërtimesh, nga të cilat ka përfituar drejtpërdrejt. 5.4 milionë euro në cilësinë e investitorit, pa investuar tek shoqëria “Homeplan” shpk.
Pasditen e së hënës oficerët e policisë gjyqësore trokitën në apartamentin e ish-kryeministrit për t’i dorëzuar zarfin me vendimin e gjykatës që caktoi masën detyrim paraqitje.
Ende nuk dihet nëse Sali Berisha ka pranuar të marrë dijeni për këtë vendim. Ky veprim i oficerëve vjen pas refuzimit që Berisha u bëri në zyrën e tij, në selinë e PD-së.
SPAK e akuzon Sali Berishën se gjatë kohës që ishte kryeministër ka kryer veprime aktive për kryerjen e kontrolleve administrative, me qëllimin e ushtrimit të presionit dhe dhënien e urdhrave konkrete, për konkludimin e procedurave të privatizimit, në favor ndër të tjerë, edhe të Malltezit.
Në dosjen e SPAK thuhet se Berisha ka vendosur strukturat e ndryshme të administratës në dispozicion të Malltezit për realizimin e procesit të privatizimit të pronës shtetërore.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
