.png)
Veç cilësisë së produkteve që hedh në treg, Apple vlerësohet nga klientët e saj edhe për sigurinë që u ofron. Serverat e kompanisë, që para pak ditësh kaloi vlerën e 1 triliard dollarëve, konsiderohen më të sigurtët dhe misioni për të depërtuar barrierat e sigurisë së tyre si i pamundur.
Por, duke iu referuar parimit matematikor që një kundërshembull rrëzon të gjithë teorinë, atëherë edhe teoria se serverat e Apple janë të pacenueshëm bie. Një 16-vjeçar australian realizoi të pamundurën dhe e bëri këtë në më shumë se një rast.
Adoleshenti nga Melburni, emrin e të cilit autoritetet nuk e bëjnë publike për shkak të moshës, jo vetëm që kishte hyrë në serverat e “Mollës”, por kishte “kafshuar” prej andej në total një material prej 90 GB.
16-vjeçari u tha autoriteteve se ishte një fans i madh i kompanisë dhe se kishte hakuar serverat e saj për të tërhequr vëmendjen dhe të realizonte ëndrrën për të punuar për gjigantin e teknologjisë.
Ajo që e bën më të sikletshme këtë rast për inxhinierët e sigurisë së Apple është fakti që hyrja e paautorizuar është vënë re shumë vonë dhe pasi kishin rrjedhur prej andej miliona fjalëkalime dhe llogari të klientëve të tyre.
Kur Apple nuhati ndërhyrjen u vu në kontakt me FBI-në. Të ndihmuar nga kompania, hetuesit federalë lokalizuan se nga vinte thyerja e barrierave të sigurisë dhe menjëherë kontaktuan me policinë federale australiane.
Kjo e fundit ndërmori një operacion në fund të vitit të kaluar dhe në banesën e adoleshentit sekuestroi dy laptopë Apple, një iPhone dhe një disk portativ.
“Numrat e serisë së dy laptopëve të sekuestruar përkojnë me numrat e serisë së pajisjeve nga ky është shkelur sistemi i sigurisë së Apple”, shkruan The Age, një forum teknologjik australian, duke cituar burime nga policia federale.
16-vjeçari u tregua bashkëpunues, duke u dhënë hetuesve federalë fjalëkalimet e pajisjeve të tij Apple, në njërin prej të cilëve gjetën një folder me emrin “hacky hack hack”. Pikërisht në këtë folder u gjetën të gjitha materialet sensitive të shkarkuara në mënyrë të paligjshme nga serverat e Apple.
Veç këtyre, autoritetet australiane deklaruan se kishin zbuluar edhe një program, me gjasa të ndërtuar nga vetë 16-vjeçari, që është përdorur për të hyrë në sistemet e sigurisë së Apple pa u diktuar. Metoda e përdorur dhe mënyra se si funksionon ky program nuk u bë e ditur me kërkesë të kompanisë amerikane.
Rasti u mbajt sekret deri më tani nga FBI dhe federalët australianë pas kërkesës së avokatëve mbrojtës të adoleshentit. Avokatët deklaruan se klienti i tyre është një emër aq i njohur në komunitetin e piratëve kibernetikë në internet, saqë publikimi i identitetit të tij do ta vendoste në rrëzik për jetën.
Më 17 gusht, Apple doli me një deklaratë ku konfirmoi se të dhënat e një pjese të përdoruesve të saj ishin vjedhur, por siguroi se në asnjë rast ato nuk janë përdorur.
Adoleshenti pranoi fajësinë e akuzave të ngritura kundër tij në Gjykatën e Minorenëve në Australi, e cila pritet që të dalë me një vendim më 20 shtator.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
