Amir Abrashi është ndër të paktët futbollistë të mbetur nga “garda e vjetër” e Kombëtares. Mesfushori i Frajburgut, pavarësisht se dëmtimet nuk e kanë lënë rehat, është një lojtar i rëndësishëm te kuqezinjtë, falë grintës që transmeton te shokët e skuadrës.
Në konferencën për shtyp, Abrashi u shpreh se është 100% gati për dy ndeshjet e radhës. Ai theksoi se nuk ka rëndësi skema e lojës, por grupi dhe angazhimi në fushë. Mesfushori beson shumë për dy fitore në 180 minutat e radhës, si dhe për një fitore të Kosovës ndaj Maqedonisë së Veriut. Mes të tjerash, Abrashi theksoi:
“Kam pasur probleme muskulore kohët e fundit, por jam shumë mirë para dy ndeshjeve të radhës, jam 100% gati për Kombëtaren. Ndihem shumë mirë, jam lojtari me më shumë ndeshje pas Berishës dhe dua ta ndihmoj ekipin edhe më shumë me eksperiencën time, dua ta forcoj grupin. Skemat i trajnerit e kam pranuar prej kohësh, thjesht duhet ta përmirësojmë ato që na kërkon ai.
Për mua nuk ka problem skema e lojës, rëndësi ka që jemi një grup i mirë dhe në rrugën e duhur, pavarësisht humbjes me Lituaninë. Shpresojmë të reagojmë dhe të marrim tri pikët ndaj Kazakistanit. Mjaft e vuajtëm ndeshjen me Lituaninë. Kam ardhur për dy fitore në dy ndeshjet e ardhshme, por le të fokusohemi te sfida e së dielës me Kazakistanin. Për sonte shpresoj për një fitore të Kosovës ndaj Maqedonisë”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.