.png)
Avokatët në Kosovë konsiderojnë që implementimi i procesit të vettingut në drejtësi është jashtëzakonisht i rëndësishëm dhe i domosdoshëm.
Sipas tyre ka gjasa që gjyqtarë e prokurorë që mbrapa tyre kanë “afera”, të largohen nga sistemi.
Avokati Tomë Gashi në një intervistë shprehet se me implementimin e vettingut do të pastrohet sistemi juridik i Kosovës, për të cilin ai thotë se nuk ka aspak besueshmëri.
“Besoj që tani të gjithë e dinë që vettingu është i vetmi instrument ligjor të cilin po e përdor Qeveria Kurti dhe së shpejti do të fillojë implementimi i këtij projekti për t’u pastruar definitivisht një herë e përgjithmonë sistemi juridik i Kosovës i cili thuajse aspak apo vetëm pak ka besueshmëri.
Mendoj se në një situatë të tillë kemi arritur për shumë arsye, e një prej shkaqeve është se edhe zyrtarë të lartë politikë në të kaluarën thuajse kanë deleguar gjyqtarë e prokurorë duke i ndihmuar ata që të emërohen në pozita kyçe e pastaj një pjesë e tyre ka mundur të jetë krejtësisht e instrumentalizuar.”
Ai thotë se këtë proces do të duhej ta përkrahte secila parti pasi është në të mirë të përgjithshme.
Ndërsa avokati Skënder Musa tha se procesi i vettingut në Kosovë është i domosdoshëm por ka gjasa të dështojë për shkak se partitë politike nuk po gjejnë kompromis ndërmjet tyre.
Ai gjithashtu thotë se ka mundësi që një pjesë e gjyqtarëve dhe prokurorëve të largohen vetë.
“Gjithashtu ka prokurorë dhe gjyqtarë të cilët nuk kanë kurrfarë performance për të qëndruar në pozitat të cilat i kanë marrë dhe për të cilat konsideroj që i kanë marrë pa meritë. Një pjesë e madhe e prokurorëve dhe gjyqtarëve të cilët e dinë veten që nuk janë për ato pozita apo që janë të ngarkuar me ndonjë hipotekë qoftë korruptive apo politike, besoj që do të largohen edhe vetë”. /EO
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
