Infeksionet nga bakteret rezistente ndaj antibiotikëve po shtohen me shpejtësi në Evropë, duke rrezikuar efektivitetin e trajtimeve mjekësore. Sipas Qendrës Evropiane për Parandalimin dhe Kontrollin e Sëmundjeve (ECDC), mbi 35 mijë persona humbin jetën çdo vit nga rezistenca antimikrobike.
Shqetësim të veçantë paraqesin bakteret Escherichia coli dhe Klebsiella pneumoniae, të cilat mund të shkaktojnë infeksione të rënda, përfshirë infeksionet e gjakut. Sipas të dhënave të ECDC-së, infeksionet nga E. coli rezistente u rritën me 16,4% gjatë periudhës 2019–2025, ndërsa ato nga K. pneumoniae u rritën me 72%.
Situata është veçanërisht shqetësuese në disa vende. Qiproja, Rumania dhe Greqia raportojnë nivele të larta të infeksioneve rezistente, ndërsa rritje të konsiderueshme janë regjistruar edhe në Hungari, Kroaci dhe Bullgari.
Përdorimi i gabuar i antibiotikëve, një nga shkaktarët kryesorë
Sipas ekspertëve, një nga arsyet kryesore të përhapjes së rezistencës është përdorimi i panevojshëm ose i papërshtatshëm i antibiotikëve, veçanërisht për infeksione virale si gripi, ftohja dhe COVID-19, ku këto barna nuk kanë efekt.
ECDC thekson se rreth 90% e antibiotikëve të përdorur te njerëzit konsumohen jashtë spitaleve, në komunitet.
Për të frenuar këtë fenomen, specialistët rekomandojnë përdorimin e antibiotikëve vetëm kur përshkruhen nga mjeku, respektimin e udhëzimeve të trajtimit, higjienën e duarve dhe vaksinimin.
Ekspertët paralajmërojnë se pa masa urgjente, infeksionet që sot trajtohen lehtësisht mund të bëhen gjithnjë e më të vështira për t’u kuruar. Kjo do të rrezikonte jo vetëm trajtimin e infeksioneve, por edhe ndërhyrje jetike si transplantet e organeve, kimioterapia dhe kujdesi intensiv.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
.png)




Lini një Përgjigje