.png)
Shkencëtarët në Universitetin e Kembrixhit kanë zhvilluar një vaksinë të re kundër gripit të shpendëve, duke përdorur inteligjencën artificiale për të ofruar mbrojtje ndaj disa varianteve të virusit me vetëm një injeksion.
Ndryshe nga vaksinat tradicionale, të cilat synojnë kryesisht variante specifike të identifikuara, vaksina e re është projektuar për të ofruar mbrojtje edhe ndaj varianteve që mund të shfaqen në të ardhmen.
“Është projektuar për të parashikuar evolucionin viral, në vend që thjesht të reagojë ndaj tij”, shpjegon Jonathan Heeney, studiues në Laboratorin e Zoonotikës Virale në Universitetin e Kembrixhit dhe drejtues i kërkimit.
Studimi, i publikuar në revistën shkencore Cell Reports Medicine, tregon se vaksina ofroi mbrojtje më të gjerë dhe rezultate më të mira mbijetese sesa vaksinat eksperimentale që synojnë vetëm një variant të virusit.
Për zhvillimin e saj, studiuesit analizuan të dhëna gjenetike nga mostrat e gripit të shpendëve të mbledhura në të gjithë botën, përfshirë viruset e identifikuara te kafshët e egra, bagëtitë dhe njerëzit. Me ndihmën e algoritmeve të inteligjencës artificiale dhe analizave evolucionare, ata krijuan pesë antigjene sintetike që përfaqësojnë diversitetin gjenetik të virusit.
Në testimet laboratorike, vaksina siguroi mbrojtje të plotë për minjtë dhe ferretat ndaj disa varianteve të ndryshme të gripit të shpendëve. Në të njëjtat kushte ekspozimi, vetëm gjysma e kafshëve të vaksinuara me një vaksinë ekzistuese kandidate të Organizatës Botërore të Shëndetësisë mbijetuan.
Sipas Heeney, përdorimi i inteligjencës artificiale përshpejton ndjeshëm projektimin e vaksinave, ndërsa testimet laboratorike mbeten thelbësore për të vlerësuar sigurinë dhe efektivitetin e tyre.
Gripi i shpendëve është një virus ARN, një kategori virusesh që mund të pësojnë mutacione të shpejta, duke krijuar variante të reja dhe duke vështirësuar zhvillimin e vaksinave.
Hapi i radhës është testimi klinik te njerëzit, për të vlerësuar nëse vaksina është e sigurt dhe efektive edhe te njerëzit. Studiuesit synojnë që e njëjta teknologji të përdoret në të ardhmen edhe për vaksinat kundër gripit sezonal dhe viruseve të tjera që ndryshojnë me shpejtësi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje