.png)
Polonia u ka bërë thirrje aleatëve evropianë të mos negociojnë me Rusinë për përfundimin e luftës në Ukrainë pa përfshirë vendet e Evropës Lindore dhe Skandinavisë.
Ministri i Jashtëm polak, Radoslaw Sikorski, deklaroi në Varshavë se rajoni nuk mund të lihet jashtë bisedimeve, pasi është drejtpërdrejt i ekspozuar ndaj kërcënimit rus.
“Gjëja e fundit që duam është që Evropa Perëndimore të merret vesh me Rusinë, duke anashkaluar evropianolindorët”, tha Sikorski, duke kujtuar se rreth 120 milionë njerëz jetojnë në vendet e këtij rajoni, disa prej të cilave ndajnë kufij me Rusinë.
Edhe kryeministri polak Donald Tusk u bëri thirrje udhëheqësve evropianë të tregohen të kujdesshëm ndaj synimeve të Vladimir Putinit dhe të jenë realistë për negociatat e udhëhequra nga SHBA-ja.
Ai paralajmëroi se kërcënimi rus mund të përshkallëzohet, veçanërisht ndaj Polonisë dhe vendeve baltike. Tusk përmendi gjithashtu sulmet hibride dhe operacionet e mundshme të sabotimit, ndërsa Polonia ka nisur një operacion përgjatë kufirit me enklavën ruse të Kaliningradit.
Polonia kundërshton rikthimin e gazit rus
Varshava shpreh gjithashtu pakënaqësi ndaj propozimeve për rifillimin e dërgesave të gazit rus drejt Evropës, një ide që, sipas raportimeve, është diskutuar nga negociatorët amerikanë.
Ministri polak i Energjisë, Milosz Motyka, e cilësoi këtë propozim absurd, duke paralajmëruar se rikthimi te gazi rus do ta bënte Evropën sërish të cenueshme ndaj shantazhit të Moskës.
Ai theksoi se Polonia nuk do ta ndryshojë qëndrimin e saj, pavarësisht ndryshimeve politike.
Meloni kërkon një përfaqësues të vetëm të Evropës
Paralajmërimet polake vijnë përpara rifillimit të bisedimeve trepalëshe mes Ukrainës, Rusisë dhe SHBA-së në nivel teknik, që pritet të zhvillohen javën e ardhshme në Abu Dabi.
Franca, Gjermania dhe Mbretëria e Bashkuar, së bashku me Komisionin Evropian dhe NATO-n, janë gjithashtu të gatshme të përfshihen në bisedime shumëpalëshe.
Ndërkohë, kryeministrja italiane Giorgia Meloni i ka dërguar një letër presidentit të Këshillit Evropian, António Costa, duke kërkuar emërimin e një të dërguari të vetëm që do të përfaqësojë Evropën në negociata.
Meloni shprehu shqetësimin për mungesën e koordinimit dhe paralajmëroi se nuk mund të negociohen angazhime pa një mandat të qartë nga vendet anëtare.
Sikorski u shpreh dakord me kërkesën e saj, duke theksuar se Evropës i duhet një përfaqësim legjitim në proces, pasi vendet evropiane po mbajnë një pjesë të madhe të kostos së luftës.
Ai kërkoi që përfaqësimi të mbështetet në Traktatin e Lisbonës, duke përfshirë Presidentin e Këshillit Evropian ose Përfaqësuesen e Lartë të BE-së për Politikën e Jashtme, Kaja Kallas.
Ndërkohë, SHBA-ja duket se po mbështetet më shumë te Komisioni Evropian si bashkëbisedues në këtë proces. Bjoern Seibert, shefi i kabinetit të Ursula von der Leyen, ka zhvilluar kontakte me të dërguarit amerikanë Steve Witkoff dhe Jared Kushner për çështjet që lidhen me të ardhmen e sigurisë evropiane.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje