.png)
Asambleja e Përgjithshme e OKB-së i kërkoi sërish Uashingtonit t’i japë fund embargos ekonomike ndaj Kubës, por këtë vit mbështetja për rezolutën ra ndjeshëm, mes përpjekjeve amerikane për të bindur më shumë vende të kundërshtojnë nismën.
Në votimin e së mërkurës, 130 vende votuan pro rezolutës, 17 kundër dhe 25 abstenuan. Mes kundërshtuesve ishin SHBA-ja dhe Izraeli. Vitin e kaluar, rezoluta mori 165 vota pro, shtatë kundër dhe 12 abstenime. Gjermania dhe Italia ishin mes vendeve që këtë herë abstenuan.
I dërguari amerikan në OKB, Mike Waltz, përshëndeti ndryshimin e qëndrimit të disa vendeve, duke deklaruar se Uashingtoni synon të zgjerojë mbështetjen kundër rezolutës.
Megjithatë, votimi nuk e detyron SHBA-në ta heqë embargon, e cila është në fuqi prej më shumë se 60 vitesh. Për këtë nevojitet vendim i Kongresit amerikan.
Ekspertët e OKB-së kanë paralajmëruar se sanksionet dhe kufizimet në furnizimin me karburant dëmtojnë të drejtat e njeriut dhe kushtet e jetesës së kubanezëve. Ndërkohë, Uashingtoni i mbron masat si mjet presioni ndaj qeverisë komuniste të Havanës.
Tensionet mes dy vendeve u përshkallëzuan edhe në selinë e OKB-së, ku diplomatët amerikanë dhe kubanezë u përfshinë në një incident me të bërtitura dhe shtyrje. Pas përplasjes, pala amerikane njoftoi dëbimin e një diplomati kubanez, ndërsa Kuba paraqiti ankesë te sekretari i përgjithshëm i OKB-së, António Guterres.
Në Kubë, pasojat e sanksioneve po rëndojnë gjithnjë e më shumë jetën e përditshme. Vendi po përballet me mungesa karburanti, ushqimesh dhe uji, si dhe me ndërprerje të zgjatura të energjisë elektrike.
Ministri i Jashtëm kubanez, Bruno Rodríguez, e cilësoi embargon si ndëshkim kolektiv ndaj popullsisë dhe akuzoi Uashingtonin për presion të vazhdueshëm ekonomik.
SHBA-ja ka votuar kundër rezolutave për heqjen e embargos që nga viti 1992, me përjashtim të vitit 2016, kur administrata e Barack Obamës abstenoi gjatë afrimit diplomatik mes dy vendeve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje