.png)
Nga Gazeta ‘Si’- Disney dhe TikTok kanë arritur një marrëveshje që do t’u lejojë krijuesve të përmbajtjeve të përdorin fragmente nga filmat e Disney-t dhe kompanive të saj nën pronësi në videot e tyre.
Kjo do të thotë se skena nga disa prej ekskluziviteteve më të mëdha në botë, si Star Wars, Toy Story dhe universi kinematografik Marvel, pritet të shfaqen së shpejti në videot e krijuesve në TikTok. Përmbajtjet do të shpërndahen gjithashtu edhe në platformën e videove të shkurtra të Disney-t, Verts.
Programi do të nisë fillimisht në SHBA dhe më pas do të zgjerohet në vende të tjera.
As Disney dhe as TikTok nuk kanë bërë publike detajet financiare të marrëveshjes. Ajo vjen pas dështimit të një marrëveshjeje prej 1 miliard dollarësh mes Disney-t dhe OpenAI, e cila do t’u lejonte përdoruesve të krijonin video me personazhe të Disney-t përmes inteligjencës artificiale.
Marrëveshja u anulua në mars, pasi OpenAI mbylli mjetin e saj të gjenerimit të videove me AI, Sora, duke deklaruar se do të përqendrohej në fusha të tjera të biznesit.
“Sot, fansat po i festojnë historitë tona në mënyra krejtësisht të reja”, tha Asad Ayaz, drejtuesi i marketingut dhe markës në Disney, pas njoftimit të marrëveshjes.
Eksperti i rrjeteve sociale Matt Navarra tha për BBC se kjo marrëveshje tregon një ndryshim të madh në mënyrën se si Hollywood-i ndërvepron me publikun.
“Hollywood-i dikur u drejtohej fansave përmes marketingut, ndërsa tani duhet t’u japë fansave materialet bazë që ata ta promovojnë vetë përmbajtjen”, tha ai.
Nga mbrojtja e të drejtave te fuqizimi i krijuesve
TikTok tha se gjatë vitit të kaluar platforma kishte mesatarisht 6.5 milionë postime në ditë që lidhen me filma dhe seriale televizive.
Shumë fansa përdorin prej kohësh fragmente filmash dhe serialesh në videot e tyre, por pa leje zyrtare këto materiale shpesh hiqen për shkak të pretendimeve për shkelje të të drejtave të autorit.
Marrëveshja e re do t’u japë krijuesve mundësinë të prodhojnë përmbajtje rreth filmave dhe personazheve të njohur pa rrezikuar fshirjen e videove.
Sipas Navarra-s, TikTok përfiton gjithashtu nga “besueshmëria e të qenit një partner zyrtar shpërndarjeje i një prej studiove më të mëdha të Hollywood-it”.
Ai shtoi se algoritmi i rekomandimeve të TikTok-ut ka fuqinë të rikthejë papritur në vëmendje personazhe, skena apo ekskluzivitete të vjetra, duke u dhënë atyre një vlerë të re.
Disney dhe TikTok thanë se programi i përbashkët do të promovojë disa video të krijuesve dhe do t’u ofrojë atyre akses në evente ekskluzive.
Sipas Gareth Sutcliffe nga Enders Analysis, marrëveshja e vendos sërish Disney-n në hapësirën e përmbajtjeve të krijuara nga përdoruesit, pas boshllëkut të krijuar nga dështimi i projektit me Sora.
Megjithatë, ai paralajmëroi se marrëveshja sjell edhe rreziqe, veçanërisht për shkak të diskutimeve të vazhdueshme mbi sigurinë e TikTok-ut në kuadër të rregullave evropiane për platformat online.
“Disney do të duhet të vendosë masa të forta kontrolli për të përzgjedhur përmbajtjet e krijuesve që do të promovohen”, tha ai.
Epoka e re e marketingut me influencerë
Krijuesit online dhe influencerët po marrin një rol gjithnjë e më të rëndësishëm në strategjitë e marketingut të markave të mëdha.
Një raport i Oxford Economics vlerësoi se krijuesit e përmbajtjeve në YouTube kontribuan me 2.2 miliardë paund në ekonominë britanike gjatë vitit 2024 dhe mbështetën rreth 45 mijë vende pune.
Sot edhe influencerët e vegjël, të fokusuar në tema specifike, po konsiderohen të vlefshëm nga kompanitë, pasi shpesh kanë komunitete më të vogla, por shumë më të angazhuara.
Disney lançoi platformën e vet të videove të shkurtra Verts në SHBA në mars dhe planifikon ta zgjerojë atë edhe në tregje të tjera/BBC/
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje