.png)
Nga Gazeta ‘Si’- Pavarësisht rritjes së fondeve publike për kulturën, aktiviteti artistik në vend ka shënuar një tkurrje të lehtë gjatë vitit 2025.
Të dhënat e publikuara nga INSTAT tregojnë se në institucionet qendrore të artit u organizuan 1.272 shfaqje dhe premiera, 10 më pak krahasuar me vitin 2024, kur numri i tyre arriti në 1.282.
Në të njëjtën kohë, financimi publik për sektorin u rrit. Shpenzimet për argëtim, kulturë dhe çështje fetare arritën në 1,65% të totalit të shpenzimeve publike dhe në 0,50% të Prodhimit të Brendshëm Bruto, nga 1,56% dhe 0,45% respektivisht një vit më parë.
Treguesit sinjalizojnë gjithashtu një rënie të interesit të të rinjve për studimet në fushat e lidhura me kulturën. Në vitin akademik 2025-2026 janë regjistruar 16.111 studentë, nga 16.645 që ishin një vit më parë. Megjithatë, sektori vijon të mbajë një peshë të rëndësishme në tregun e punës, me 33.893 të punësuar në aktivitete dhe profesione të lidhura me kulturën, ose rreth 3% të punësimit total në vend.
Nga ana tjetër, trashëgimia kulturore po njeh një rritje të vazhdueshme të interesit. Numri i vizitorëve në muze, kala dhe parqe arkeologjike arriti në 1.523.587 gjatë vitit 2025, duke u rritur me 15,9% krahasuar me një vit më parë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje