.png)
Nga Gazeta ‘Si’-Indeksi i Klimës së Biznesit në Shqipëri, matur nga Dhoma Amerikane, ka shënuar rënie gjatë 2025-s, duke u vlerësuar me 40.34 pikë nga 100, rreth 6 pikë më pak se vitin e shkuar.
Sipas AmCham, ky është një tregues negativ për mjedisin ekonomik dhe institucional në vend.
Anketa tregon se problemet më të theksuara mbeten konkurrenca e pandershme dhe prania e monopoleve në treg, burokracia qeveritare, klima politike e brendshme, niveli i informalitetit dhe mungesa e fuqisë punëtore të kualifikuar. Korrupsioni vazhdon gjithashtu të perceptohet si një nga pengesat kryesore për zhvillimin e biznesit dhe përmirësimin e klimës së investimeve.
Nga ana tjetër, raporti evidenton disa tregues me vlerësim më pozitiv. Furnizimi me energji elektrike renditet si elementi më i favorizuar nga bizneset, i ndjekur nga kërkesa për mallra dhe shërbime në tregjet e eksportit, marrëdhëniet me autoritetet doganore, ecuria e investimeve dhe niveli i rendit e sigurisë në vend.
Dhoma Amerikane e Tregtisë vlerëson se përmirësimi i klimës së biznesit kërkon reforma më të thella për uljen e burokracisë, luftën kundër informalitetit dhe korrupsionit, si dhe politika më efektive për zhvillimin e kapitalit njerëzor. Sipas saj, adresimi i këtyre sfidave mbetet vendimtar për rritjen e konkurrueshmërisë së ekonomisë shqiptare dhe tërheqjen e investimeve të reja në vitet e ardhshme.
Sipas raportit, pritshmëritë e bizneseve për vitin 2026 mbeten më optimiste se rezultati aktual, megjithëse hendeku mes pritshmërive dhe realitetit vijon të jetë i pranishëm edhe këtë vit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje