.png)
Gjykata e Posaçme kundër Korrupsionit dhe Krimit të Organizuar ka dënuar me nga 4 vite burg Florenc Çapjan, Elvin Merlikën dhe Alket Xhixhën.
Sipas vendimit të dhënë nga trupi gjykues i përbërë nga gjyqtarët Kujtim Vraniçi, Rudina Palloj dhe Marinela Osmani, të tre të pandehurit u gjykuan me procedurë të shkurtuar.
Fillimisht, gjykata caktoi ndaj secilit prej tyre një dënim prej 6 vitesh burg për veprën penale të “Sigurimit të kushteve dhe mjeteve materiale për të kryer vrasje”, si dhe 2 vite burg për akuzën e “Grupit të strukturuar kriminal”.
Sipas vendimit, Florenc Çapja u shpall fajtor për sigurimin e kushteve dhe mjeteve materiale për vrasjen e Sokol Sanxhaktarit, ndërsa Elvin Merlika dhe Alket Xhixha për sigurimin e kushteve dhe mjeteve për vrasjen e Indrit Dokles.
Emri i Elvin Merlikës doli në dosje ‘Plumbi i Artë’, teksa i penduari i drejtësisë, Nuredin Dumani ka rrëfyer se Elvin Merlika së bashku me Alket Xhixhën e kanë takuar në Kosovë duke i propozuar atij vrasjen e Indrit Dokles.
Vrasja e Dokles u kërkua nga Ervis Martinaj, i cili i ofroi edhe 500 mijë euro Dumanit për vrasjen e Dokles, ish anëtar i bandës së Durrësit.
Florenc Çapja u ekstradua nga Dubai në maj të vitit 2025, pasi ishte në arrati prej 10 vitesh. Përveç dënimit me burg përjetë për vrasjen e Nezir dhe Gentian Beqirit, babë e bir në Elbasan, ai ishte shpallur në kërkim për vepra të tjera penale nga SPAK dhe Prokuroria e Elbasanit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje