.png)
Gazeta Si – Pikërisht kur modelet e para u dërguan te blerësit, më shumë se tetë muaj më vonë se sa ishte njoftuar fillimisht, një tjetër pengesë e madhe përfshiu projektin e rrënuar të të ashtuquajturit “Trump Phone”, një telefon inteligjent i tregtuar nga një kompani në pronësi të familjes së presidentit të SHBA-ve, Donald Trump.
Të dhënat personale – emrat, adresat e email-it dhe numrat e telefonit – të atyre që e blenë atë, u vodhën dhe u publikuan në internet, zbuluan YouTubers-at ditët e fundit.
“Trump Mobile”, kompania që prodhon pajisjet, konfirmoi problemet e sigurisë, duke fajësuar një platformë të palës së tretë që menaxhon disa nga operacionet e faqes dhe duke pretenduar se nuk kishte gjetur prova të të dhënave që shpërndaheshin në internet.
“Trump Phone” ishte një operacion i çuditshëm dhe problematik, i njoftuar qershorin e kaluar nga Organizata Trump, njëkohësisht me themelimin e një kompanie të re telefonike, “Trump Mobile”.
Është vetëm një nga disa sipërmarrje biznesi të nisura nga familja Trump gjatë dy presidencave të tij, të cilat e kanë pasuruar më tej atë: vetëm në dymbëdhjetë muajt e parë të mandatit të tij të dytë, sipërmarrjet e reja të biznesit të lidhura me Trump-ët, i kanë sjellë familjes afërsisht 4 miliardë dollarë fitime, sipas “Wall Street Journal”.
Telefoni inteligjent, i quajtur “T1 Phone”, u listua për 499 dollarë dhe u reklamua si “Made in USA” për disa ditë.
Kjo etiketë u hoq më vonë, pasi raporte të shumta theksuan se prodhimi i një telefoni inteligjent në Shtetet e Bashkuara është në thelb i pamundur, duke pasur parasysh se pjesa më e madhe e zinxhirit të furnizimit të prodhimit të telefonave është në Azi. Tani, ekipi i marketingut thotë se është “dizajnuar duke pasur parasysh idealet amerikane”.
Por kryesisht ishin vonesat e konsiderueshme që hodhën dyshime mbi projektin. Telefonat u njoftuan fillimisht për në gusht, pastaj dërgesat u shtynë për në tetor dhe më në fund për në maj.
Edhe pse porosia kushtoi 100 dollarë, në një moment kushtet e shitjes së telefonit u ndryshuan në mënyrë që ato të mos garantonin dërgesën aktuale. Megjithatë, javën e kaluar, pas muajsh pritjeje, pajisjet e para më në fund u dërguan.
Telefoni i ngjan shumë një modeli kinez që mund të blihet për rreth një të tretën e çmimit në zinxhirin e supermarketeve, Walmart, raportoi CNN.
Ekspertë të tjerë kanë thënë se i ngjan shumë “HTC U-24 Pro”, një model i disa viteve më parë i prodhuar në Tajvan.
Krahasuar me njoftimet fillestare, ai ka një ekran më të vogël dhe më pak memorie, por dizajni i artë mbetet.
Telefoni inteligjent ka gjithashtu një portë për kufje 3.5 mm, atë të modës së vjetër, që tani mungon në pothuajse të gjitha modelet e reja.
Sipas Coffeezilla, YouTuber-it që raportoi problemet e sigurisë së faqes, ekzistojnë afërsisht 30,000 ID unike të klientëve, të cilat korrespondojnë me njerëzit që porositën telefonin inteligjent. Vitin e kaluar, kishte qarkulluar një vlerësim shumë më i lartë prej gati 600,000 klientësh.
Në javët e fundit, disa politikanë demokratë ishin përpjekur t’i shkaktonin probleme Trumpit në lidhje me operacionin “Trump Phone”.
Senatorja Elizabeth Warren i kishte kërkuar Komisionit Federal të Tregtisë (FTC), agjencisë qeveritare që mbron konsumatorët, të hetonte premtimet e paplotësuara ndaj klientëve në lidhje me dorëzimin dhe prodhimin amerikan të telefonit.
Kjo ishte një kërkesë jorealiste, duke pasur parasysh se FTC-ja aktuale është shumë e afërt dhe e varur nga Trump.
Senatori Mark Warner, nga ana tjetër, kishte denoncuar se si plani i propozuar nga “Trump Mobile” ishte shumë më i shtrenjtë – 47.45 dollarë, një referencë për dy presidencat e Trump – sesa ato të konkurrentëve dhe se premtonte thirrje dhe të dhëna të pakufizuara pavarësisht se kontrata përmbante kufizime të shumta.
Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje