.png)
Nga Gazeta ‘Si’– Më datë 26 maj pritet të mbahet Konferenca e radhës Ndërqeveritare me Shqipërinë, për të diskutuar rreth mbylljes së kapitujve për integrimin në Bashkimin Europian.
Raporti i Vlerësimit të Përkohshëm të Standardeve (IBAR) për Shqipërinë ka avancuar zyrtarisht përtej nivelit të grupit teknik duke u përfshirë në agjendën e mbledhjes së të premtes të ambasadorëve të shteteve anëtare të BE-së.
Raporti mund të miratohet nesër si një “pikë I” pa diskutim nga ambasadorët.
Miratimi formal nga COREPER do të hapë rrugën për mbledhjen e konferencës ndërqeveritare më 26 maj për të filluar mbylljen e kapitujve të negociatave.
Që Shqipëria është vetëm një hap larg mbylljes së kapitujve me BE-në, këtë e tha edhe kreu i grupit parlamentar të PS-së Taulant Balla paraditen e sotme.
Në një dalje për mediat, duke u ndalur tek vizita e tij tre-ditore në Gjermani, ai tha se “Të qëndrojmë tek momentumi shumë i mirë që ka të bëjë me rrugën europiane të Shqipërisë. Jemi në përmbyllje të një jave që BE në respekt të procedurave burokratike kalon nga grupi i punës tek Komiteti i përfaqësuesve, nesër, ku në njëfarë mënyre miratohet gjithë ajo punë kolosale në shumë institucione shtetërore, nga gjithë ato djem edhe vajza të përfshirë në proces, që i kemi quajtur piketa të ndërmjetme.”
Për të disatën herë, Balla theksoi se të gjitha vendet anëtare e rekomandojnë si shembull për vendet e tjera. Madje shtoi se shumë ekspertë moldavë janë instruktuar të vijnë në vendin tonë për të parë rezultatet nga afër.
“Sa i takon Moldavisë, ekspertët moldavë vijnë në Shqipëri në mënyrë të rregullt për të parë nga afër se si e bëmë ne vetingun e gjyqtarëve”, tha Balla se kjo ishte “krenari për çdo shqiptar”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje