.png)
A je më konservator apo jokonvencional? Cila ngjyrë të përfaqëson më mirë? A e sheh veten si një person falës? Këto janë disa nga pyetjet që EveryHuman do t’ju bëjë përpara se të krijojë tre aroma të personalizuara në shishe 5 ml, me çmim 42 paund.
Kompania, e themeluar në vitin 2018 nga Frederik Duerinck dhe dizajnerja e aromave Anahita Mekanik, përdor inteligjencë artificiale për të përputhur profilin e çdo klienti, të krijuar përmes një pyetësori online, me një paletë prej 52 opsionesh, secila e përbërë nga 2 deri në 20 përbërës. Më pas, këto përzihen për të krijuar aromën tuaj personale.
EveryHuman është një nga kompanitë në rritje që po përdorin AI-në për këtë qëllim. Startup-i me bazë në Barcelonë, i lançuar nga Álvaro Suárez në vitin 2025, ndjek të njëjtën filozofi me “Aura”, një parfumier me inteligjencë artificiale. Këtu nuk ka pyetësor; procesi fillon duke i thënë “Aura”-s, përmes një chat-i online, çfarë lloj parfumi dëshironi.
Suárez thotë se mund të jetë diçka shumë specifike dhe personale, si “aroma e qenit tim që ka ndërruar jetë”. Ai shpjegon: “Më parë parfumierët e personalizuar ishin të aksesueshëm vetëm për perandorë, mbretër dhe familje mbretërore. Parfumieri vinte dhe të bënte pyetje derisa të kuptonte çfarë doje. Ne bëjmë të njëjtën gjë, por e demokratizojmë.” Një aromë 20 ml kushton 95 dollarë dhe mund të blihet online ose në tre pika fizike në Amerikën e Veriut.
Ky lloj përdorimi i AI-së mund të duket si një truk marketingu, por personalizimi është një faktor i rëndësishëm për blerësit e parfumeve, veçanërisht për milennialët e rinj dhe Gen Z. Sipas Mintel, rreth 45% e personave nën 45 vjeç përdorin aromat për të shprehur veten.
Ekspertët e industrisë thonë se AI po transformon jo vetëm përvojën e klientit, por edhe mënyrën e punës në industrinë e parfumeve nga kërkimi dhe zhvillimi, te formulimi, testimi dhe marketingu duke ulur kostot dhe kohën e prodhimit.
Shpejtësia është bërë gjithnjë e më e rëndësishme në një industri të ndikuar nga trendet e shpejta në TikTok. AI ndihmon gjithashtu në reduktimin e dështimeve të produkteve, duke përmirësuar saktësinë e testimeve.
Kompanitë e mëdha si Givaudan, Symrise dhe dsm-firmenich tashmë po përdorin mjete të brendshme me AI, si “Carto”, për të ndihmuar parfumierët në krijimin dhe reformulimin e aromave. Megjithatë, ekspertët theksojnë se AI nuk po zëvendëson parfumierët.
Startupi Osmo synon të shkojë edhe më tej, duke zhvilluar “një sens digjital të nuhatjes” për kompjuterët, me potencial përdorimi edhe në fusha si zbulimi i sëmundjeve përmes aromës.
Në përgjithësi, industria po lëviz drejt një të ardhmeje ku AI dhe aroma bashkohen për të krijuar produkte më të shpejta, më të lira dhe më të personalizuara për konsumatorët./FT
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje