.png)
Gazeta Si – Dy vëllezërit, Jurgen dhe Kevin Neza dhe kushëriri i tyre, Hysen Neza, janë lënë në burg, pasi akuzohen se morën peng ndërtuesin Florjan Sula pak ditë më parë duke e dhunuar në një magazinë në Xhafzotaj të Durrësit.
Tre të arrestuarit nuk kanë folur në sallën e gjyqit, por avokati i tyre mbrojtës, Ferdinand Cakaj ka pretenduar se ata nuk e kanë marrë peng Sulën. Cakaj ka pohuar se biznesmeni i kishte atyre një borxh prej 60 milionë lekë dhe se e morën me automjet për t’u sqaruar.
Mbrojtja pretendoi se klientët e tij, kur kanë konstatuar se Florjan Sula ka qenë në pamundësi financiare për t’i kompensuar shumën e parave, e kanë lënë të lirë.
Njëri prej tyre, theksoi mbrojtja, është vetëdorëzuar pasi mësoi që ishte në kërkim, ndërsa dy të tjerët kanë qenë në momente depresioni dhe nën efektin e lëndëve narkotike, por nuk paraqiti dokumentacion në gjykatë për të vërtetuar këtë pretendim.
Tre të arrestuarit pak ditë më parë, u prezantuan si agjentë të BKH dhe rrëmbyen 32-vjecarin, të cilin e mbajtën për disa orë peng në një subjekt privat në Xhafzotaj.
Sipas hetimeve paraprake, në 31 mars tre të rinjtë rrëmbyen, dhunuan dhe i kërkuan Florjan Sulës 2 milionë euro në këmbim të lirimit të tij.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje