Taksat e larta largojnë të pasurit nga Nju Jorku, shifrat e ‘eksodit të madh’

Gazeta Si – Njëqind e njëzet e pesë mijë. Një shifër monstruoze që mishëron një fenomen që, në Amerikë dhe më gjerë, po ngjall debat midis ekonomistëve.

Bëhet fjalë për numrin e të pasurve (dhe mega-të pasurve) që janë “arratisur” nga shteti i Nju Jorkut për të kërkuar strehim në Florida dhe Teksas, ku taksat janë dukshëm më të ulëta.

Një ndryshim strategjik i vendbanimit, por që ka rezultuar në një mungesë prej 14 miliardë dollarësh në të ardhurat tatimore për arkën e shtetit. Tani, duke pranuar emergjencën, shteti po përpiqet ta adresojë çështjen.

“Arratisja e madhe” – Sipas ekspertëve, “arratisja” filloi gjatë epokës së Covid-it, kur shteti i Nju Jorkut vendosi kufizime të konsideruara “të rrepta” nga popullsia.

Situata u përkeqësua më pas kur, gjatë fushatës zgjedhore të vitit 2022, guvernatorja e zgjedhur demokrate, Kathy Hochul u bëri thirrje republikanëve të largoheshin nga Nju Jorku: “Merrni një autobus dhe shkoni në Florida. Atje e keni vendin! Ju nuk përfaqësoni vlerat tona; ju nuk jeni njujorkezë”.

Republikanët (ata të pasurit), u larguan nga shteti dhe duke shkaktuar… një deficit buxhetor. Tani Hochul po përpiqet ta ndreqë situatën.

Kundërpropozimi i Hochul – “Ne do të zbatojmë një sistem që nuk takson vetëm për hir të taksave dhe që merr parasysh edhe faktin se kam nevojë për individë me pasuri të lartë neto për të mbështetur programet bujare sociale të shtetit tonë”, tha Hochul, duke ftuar “milionerët demokratë” të “shkojnë në Palm Beach” – Florida – “për të sjellë njerëz këtu në New York, sepse baza jonë tatimore është gërryer”.

Guvernatorja demokrate përfundoi: “Nuk kam asnjë shqetësim për rritjen e taksave, por po konkurroj me shtetet ku barra tatimore është më e ulët”.

Pse është Florida kaq e përballueshme? – Florida, e konsideruar si një “parajsë tatimore” në Shtetet e Bashkuara, tërheq investitorë dhe sipërmarrës për shkak të mungesës së taksave shtetërore mbi të ardhurat personale.

Ajo ofron norma të ulëta tatimore për korporatat, asnjë taksë shtetërore mbi trashëgiminë/dhuratën dhe gëzon një regjim tatimor përgjithësisht të favorshëm, duke pasur parasysh barrën e ulët tatimore.

Megjithatë, në Nju Jork, taksa shtetërore mbi të ardhurat mund të arrijë në 10.9% për personat me të ardhura të larta, ndërsa taksat mbi pronën ndryshojnë.

Sipas të dhënave nga fillimi i vitit 2026, shteti krenohej me barrën më të lartë të kombinuar tatimore në SHBA.

Kjo nuk është çështje e vogël, duke pasur parasysh se “shumë të pasurit” përfaqësojnë më pak se 1% të totalit të taksapaguesve, por paguajnë afërsisht 41% të totalit të taksës mbi të ardhurat.