.png)
Gazeta Si – Bosi shqiptar i drogës, Flamur Sinanaj (51 vjeç) mbërriti të enjten e kaluar në Belgjikë me një fluturim komercial nga Turqia, nën shoqërimin e agjentëve të policisë federale.
Shqiptari nga Anversa, i cili ka jetuar gjatë në Deurne, përdorte mbiemrin “Maradona” në SKY ECC, shërbimin e mesazheve të botës së krimit. Në botën reale, ai njihet si “Baksteen”.
Sinanaj qëndroi dy e gjysmë vjet në një qeli turke duke pritur ekstradimin në Belgjikë, ku ishte dënuar një herë në vitin 2010 me tetë vjet burg për trafikun e drogës.
Tani, prokuroria kërkoi ekstradimin e tij për t’u gjykuar në procesin e madh “Bressers”. Një grup i udhëhequr nga Sinanaj kishte nxjerrë kokainën nga kontejnerët që banda kishte kontrabanduar në Evropën Perëndimore.
Sipas aktakuzës, ai gjithashtu kishte vepruar si korrier parash, duke zhvendosur 17 milionë euro të bandës. Procesi “Bressers” u pezullua kohët e fundit pas një kërkese të suksesshme për heqjen e një gjyqtari. Më 16 mars, gjykata do të mblidhet sërish me tre gjyqtarë të rinj dhe do të vendoset sesi do të vazhdojë çështja.
Në vitin 2024, SPAK i konfiskoi 1.2 milionë euro pasuri Flamur Sinanajt, si pjesë e një grupi kriminal të trafikut të drogës.
Pas kërkesës së SPAK, GJKKO ka konfiskuar dhe ka kaluar në favor të shtetit të pasuritë e tij të luajtshme dhe paluajtshme.
Bëhet fjalë për apartamente, 10 llogari bankare, motor uji, varkë vetorizine dhe dy automjete “GMC” dhe “Mercedes Benz”.
Ekstradimi i kriminelëve të drogës nga Turqia në Belgjikë është i jashtëzakonshëm. Kjo tregon se kriminelët e fshehur nuk janë më të sigurt edhe atje.
Disa vite më parë, policia vuri re se gjithnjë e më shumë kriminelë të drogës që ishin në arrati largoheshin nga Dubai dhe shkonin në Turqi.
Që nga 6 janari 2022, të huajt që investojnë 500.000 dollarë (449.000 euro) ose blejnë prona mund të marrin shtetësinë turke.
Një mundësi e jashtëzakonshme për kriminelët ose të dyshuarit në arrati. Disa kriminelë të drogës që nuk ndiheshin më të sigurt në Dubai u zhvendosën për këtë arsye në Turqi.
Flamur Sinanaj dhe shoku i tij boshnjak Sani al Murdaa ikën nga Anversa drejt Dubait në vitin 2023, pas përfshirjes në një seri hakmarrjesh.
Në mars 2023, një sulm u krye ndaj një restoranti në Wilrijk, ku Al Murdaa ishte pronar. Nga Dubai, ata u zhvendosën në Turqi dhe morën shtetësinë turke.
Kur Belgjika kërkoi ekstradimin e tyre, procesi nuk mund të bëhej, pasi është një vend që nuk ekstradon qytetarët e vet.
Por kur media lokale i zbuloi kush ishin, ata humbën shtetësinë turke. Qeveria turke nuk donte që kriminelët ta shfrytëzonin ligjin e lehtë të shtetësisë si një strehë të sigurt.
Megjithatë, procesi i ekstradimit zgjati mbi dy vjet. Sani Al Murdaa mbetet ende i zhdukur. Nuk dihet nëse ai është ende në Turqi.
Javën e kaluar, ai u dënua në mungesë në Dendermonde me 15 vjet burg për rolin e tij në çështjen “Kookwas”, ku kokaina transportohej në Belgjikë dhe përpunohej.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje