Gazeta Si – Deputetja e Partisë Socialiste, Olta Xhaçka qëndroi rreth dy orë këtë të martë në SPAK, ndërsa nuk dihen zyrtarisht arsyet e thirrjes së saj nga prokurorët.
Pasi ka dalë nga godina, Xhaçka nuk ka dhënë shpjegime për mediat mbi praninë e saj në Prokurorinë e Posaçme.
Ish-ministrja e Mbrojtjes mbërriti e vetme në Strukturën e Posaçme, pa avokatë, ç’ka nënkupton se ajo është thirrur si person për të dhënë deklarime për një hetim për të cilin ka dijeni.
Deri në këto momente nuk ka një konfirmim zyrtar mbi arsyen apo mbi hetimin konkret për të cilin Xhaçka është thirrur.
Por kjo nuk është hera e parë që Xhaçka paraqitet në SPAK. Gati një vit më parë, ajo ka dhënë shpjegime për dy kallëzime për tjetërsimin e pronave të ushtrisë, të bëra nga ish-gjenerali Artur Meçollari, që ngrinin dyshime për shpërdorim detyre dhe falsifikim dokumentesh.
Konkretisht bëhej fjalë për gjirin detar të Limionit në Sarandë dhe një sipërfaqe trualli në bazën detare të Shëngjinit.
Në një nga këto kallëzime, i kallëzuar ishte edhe Presidenti i Republikës, Bajram Begaj. Të dyja dosjet vijojnë të jenë të hapura dhe nën hetim.
Më herët, Xhaçka ishte paraqitur në organin e akuzës lidhur me denoncimin e bërë ndaj saj për përfitimin e pronave në bregdet nga bashkëshorti i saj gjatë kohës që ishte ministre, çështje për të cilën SPAK nuk gjeti shkelje.
Më 5 gusht të vitit 2023, Fredi Beleri bëri një kallëzim në SPAK, ku akuzonte kryebashkiakun në detyrë të Vlorës asokohe, Jorgo Goro, biznesmenin Gaçi dhe ish-ministren Xhaçka për “falsifikim dokumentesh” dhe “shpërdorim detyre”.
Beleri pretendonte se një pronë prej 5512 m2 ishte tjetërsuar nëpërmjet falsifikimit të dokumenteve dhe më pas ishte blerë nga biznesmeni Gaçi, i cili përfitoi edhe statusin e investitor strategjik.
Lidhur me këtë, u thirrën në SPAK Jorgo Goro dhe Artan Gaçi, ndërsa u sekuestrua në Bashkinë e Himarës i gjithë dokumentacioni i nevojshëm.
Më 25 tetor 2023, 5512 m2 truall në pronësi të Artan Gaçit, u vendos nën sekuestro preventive nga Prokuroria e Posaçme. Sipërfaqja në fjalë, mësohet se ishte pjesë e tokës që Gaçi kishte fituar statusin e investitorit strategjik.
Kjo çështje po ashtu ka qenë herë pas here shkak për akuza nga ana e opozitës, që asokohe kërkoi heqjen e mandatit të Xhaçkës si deputete.
Ndërkohë, Xhaçka theksonte se bashkëshorti i saj nuk kishte marrë asnjë metër katror tokë nga shteti për investimin e tij privat dhe vënia nën sekuestro preventive prej disa javësh e një pjese të kantierit të investimit, është bërë për të hetuar origjinën e një prone private qysh nga viti 1994.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
