.png)
Nga Gazeta ‘Si’- Ish-komandanti i Përgjithshëm i NATO-s, Wesley Clark, ka deklaruar në Dhomat e Specializuara të Kosovës se UÇK-ja nuk funksiononte me një strukturë të mirëfilltë komanduese apo kontrolluese.
Clark i cili udhëhoqi fushatën ajrore të NATO-s kundër caqeve ushtarake serbe në vitin 1999, dha dëshminë e tij të hënën në Hagë dhe pritet ta vazhdojë sot më 18 nëntor 2025.
Në ditën e parë të dëshmisë së tij në mbrojtje të ish-presidentit të Kosovës, Hashim Thaçi, Clark, tha se nuk besonte se Thaçi ishte udhëheqës ushtarak i Ushtrisë Çlirimtare të Kosovës.
I pyetur nëse ka qenë e mundur që UÇK-ja të ketë pasur zinxhir komandues funksional me hierarki të plotë e NATO-ja dhe Shtetet e Bashkuara të mos e kenë ditur, Clark tha shkurtimisht: “Jo”.
Ai tha se nuk e di nëse Thaçi ka luftuar dhe nuk ishte në dijeni për Shtabin e Përgjithshëm të UÇK-së.
Clark është dëshmitari i fundit i thirrur nga mbrojtja e Thaçit dhe ai pritet ta mbarojë dëshminë të mërkurën.
Clark u pyet të sqaronte deklaratën e tij se nuk besonte që ishte drejtë që çdo sjellje e keqe e të tjerëve t’i atribuohej Thaçit.
Gjenerali amerikan në pension tha se nuk mendon se Thaçi kishte pasur kontroll mbi njerëzit që kishin kryer akte të dhunës në verën e vitit 1999.
“Unë nuk mendoj që Thaçi ka pasur kontroll mbi njerëzit që kanë bërë akte të tilla. Së pari nuk është e qartë që dhuna ishte kryer nga UÇK-ja, edhe po të ishte kështu ajo ishte organizuar nga individë të caktuar. Unë kam folur me Mike Jackson për këtë dhe sigurisht ai ka folur me komandantët e tyre dhe kanë qenë në kontakt të UÇK-së. Unë nuk besoj se ka qenë UÇK-ja, por edhe po të ketë qenë UÇK-ja nuk kishte askush kontroll, nuk kishte mekanizëm kontrolli mbi atë çfarë ndodhte në terren. Nuk funksiononte që ju jepnit urdhër dhe prisnit që të zbatohej ai. Ishte më tepër një rezistencë. Njerëzit rezistonin sepse donin të shpëtonin jetën e tyre”, tha ai.
Sipas Clark, ai nuk kishte informacione se UÇK-ja qëndronte pas akteve të dhunës pasi do të sigurohej që ato të ndaleshin.
“UÇK-ja e kuptonte qartë se nuk do të merrnin atë që morën, largimi i forcave serbe, po të mos ishte NATO. Ata nuk kishin asnjë mjet që të mbronin veten kundër presionit të forcave serbe. pra, ishte një rast shumë i qartë që motivi i tyre ishte që të dëgjonin dhe të bënin atë që kërkonte KFOR-i”, tha Clark.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
