.png)
Nga Gazeta Si – Lando Norris zhvilloi një xhiro mbresëlënëse për të siguruar “pole position” gjatë “Provave Zyrtare Sprint” në “Çmimin e Madh të Sao Paulos”, ku britaniku la pas Kimi Antonelli-n e Mercedes dhe shokun e tij të skuadrës, Oscar Piastri-n.
Pas vendosjes së një kohe standarde me xhiron e parë në sesionin e 3 kualifikues, Norris u përmirësua edhe më tej me kohën 1’09”243.
Antonelli ishte ndjekësi më i afërt, vetëm 0.097 sekonda pas tij, duke siguruar vendin e 2 në vijën e parë të nisjes.
Megjithëse tregoi ritëm të mirë të premten, Piastri u detyrua të kënaqej me vendin e 3, ndërsa George Russell i shtoi një ditë pozitive Mercedes-it me vendin e 4.
Aston Martin pati gjithashtu një paraqitje pozitive në Interlagos. Fernando Alonso u rendit i 5, përpara Lance Stroll, i cili përfundoi i 7.
Mes tyre u pozicionua Max Verstappen, që nuk e fshehu zhgënjimin pas kalimit të vijës së finishit.
Charles Leclerc siguroi vendin e 8 për Ferrari-n, ndërsa Isack Hadjar (Racing Bulls) dhe Nico Hulkenberg (Kick Sauber) plotësuan dhjetëshen më të mirë.
Eventi Sprint do të zhvillohet të shtunën në orën 15:00.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
