.png)
Gazeta Si – Banorët e një ndërtese në qytetin e Shkodrës, prej nga nisi konflikti që përfundoi tragjikisht me vrasjen e gjyqtarit Astrit Kalaja këtë të hënë, kanë folur mes lotësh për përvojën e tyre të gjatë me gjyqet, kërcënimet dhe pasojat që lanë pas.
Ata shprehen të tronditur për vrasjen e gjyqtarit dhe theksojnë se vendimi i tij ishte i drejtë, duke pohuar se Kalaja “vdiq për ne”. “Jemi nën kërcënim të vazhdueshëm,” thotë një nga banorët.
Të shqetësuar për sigurinë e tyre, banorët bëjnë përgjegjëse institucionet për përshkallëzimin e konfliktit. “Bashkia dhe hipoteka e kanë bërë këtë punë,” thotë një tjetër banor.
“Kjo ka qenë dhe është ende pronë e shtetit. Gjyqet i ka humbur ai, s’ka dokument për të na nxjerrë jashtë. Kur i humbi gjyqet, u ngushtua”.
Konflikti për pronën nisi që në vitin 2012 dhe çështja ka kaluar në disa shkallë gjyqësore. Sipas banorëve, konflikti me familjen e vrasësit të dyshuar Elvis Shkambi, 30 vjeç, ka qenë burim kërcënimesh të vazhdueshme, të cilat i kanë denoncuar edhe në polici.
“Ka 12 muaj që ka fol në gjyq, pavarësisht se është i shtetit, ne personalisht banprët kena shku e kena bo denoncim në polici. E kena bo denoncim se ka thënë Gjon Shkambi në emision do më jepni dëmet”.
Një tjetër banor, i prekur emocionalisht, tha: “Ma bëj hallall djali jem. Ndihemi të rënduar. Ndjejmë keqardhje të madhe për atë burrë që vdiq për burrninë e vet në radhë të parë, por dhe për ne”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
