Vritet 44-vjeçari shqiptar në Kolumbi, dyshohet për larje hesapesh mes bandave të drogës

Gazeta Si – Një 44-vjeçar shqiptar, i identifikuar si Artur Tushi me nënshtetësi ekuadoriane, është ekzekutuar me armë zjarri në qendrën tregtare Santa Fe pasditen e të dielës, 5 shtator 2025.

Sipas mediave kolumbiane, policia ka arrestuar vrasësin, i cili përdori një motor për t’u larguar nga vendi i ngjarjes pas ekzekutimit. Autori e qëlloi më shumë se pesë herë. Plagët ishin në gjoks dhe në krahë.

Duke e cilësuar ngjarjen si vrasje me pagesë, mediat theksojnë se janë sekuestruar arma e zjarrit dhe motori, ndërsa ka mbetur e plagosur edhe një grua që shoqëronte shqiptarin.

Asesinaron a un ciudadano albanés en la avenida El Poblado. pic.twitter.com/AlmWYLhKaZ
— Julián Vásquez (@Julian_VasquezP) October 5, 2025

Paraprakisht dyshohet se vrasja ka ndodhur për larje hesapesh mes bandave të drogës. Dëshmitarët në vendngjarje kanë parë një të ri që është afruar me motoçikletë, e ka pyetur shqiptarin për emrin dhe pasi ka marrë konfirmimin ka qëlluar me armë drejt tij.

“Ai i kërkoi vetëm emrin e personit dhe, kur e konfirmoi se ishte ai e qëlloi për vdekje”, tha një dëshmitar sipas mediave lokale.

Sekretari i Sigurisë së qytetit, Manuel Villa Mejía, informoi se viktima ishte një burrë që kishte dokumente ekuadoriane, por është me kombësi shqiptare.

“Motivet dhe detajet e rastit janë duke u hetuar në këtë moment nga autoritetet”, deklaroi Villa Mejía.

Sipas hetimeve të InSight Crime, rrjetet shqiptare janë një aktor kyç në trafikun e drogës në Amerikën Latine, duke përdorur Ekuadorin si bazë kryesore për operacionet e tyre transatlantike.

Këto grupe kriminale ballkanike kanë dërguar përfaqësues në Amerikën e Jugut për të negociuar drejtpërdrejt me prodhuesit e kokainës si FARC apo grupi “Los Urabeños” në Kolumbi, me qëllim që të sigurojnë çmimin më të ulët të mundshëm me shumicë.

Rreth një javë më parë, një 62-vjeçar shqiptar i shpallur në kërkim që prej vitit 2016 në Itali, është arrestuar në qytetin e Tunjas në Kolumbi i akuzuar për trafik ndërkombëtar droge.

Genti Krasniqi, ishte në listën e personave më të kërkuar nga drejtësia italiane, pasi në vitin 2016 në një apartament luksoz që përdorte në Milano, iu zbuluan sasi të mëdha heroine që i kishte transportuar nga Tirana. Në atë kohë ai arriti të arratisej nga Italia dhe që prej atëherë është në kërkim ndërkombëtar.

Krasniqi po qëndronte në një vend të vogël, duke u paraqitur si turist i zakonshëm, ndërsa në realitet ishte një prej personave më të kërkuar në trafikun ndërkombëtar të drogës.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.