.png)
Nga Gazeta Si- Pavarësisht se dega e Mjekësisë së përgjithshme ka plotësuar kuotat që në raundin e parë të regjistrimeve, duke dëshmuar sërish statusin elitar që ruan kjo degë në preferencat e studentëve shqiptarë, interesi për degët mjekësore në tërësi ka rënë ndjeshëm.
Pedagogu i Fakultetit të Mjekësisë, Ilir Alimehmeti, deklaron për Gazetasi.al se në vitin 2025 janë regjistruar vetëm 1,813 aplikime për degët mjekësore në raundin e parë, krahasuar me 3,183 aplikime në vitin 2024, një rënie prej gati 40%.
“Kjo është një shifër që na bën të reflektojmë. Ka një kontrast mes perceptimit se mjekësia është një fushë e garantuar dhe realitetit që tregon një interes gjithnjë e më të vogël nga brezi i ri,” u shpreh Alimehmeti.
Kuotat e lira dhe sfida për universitetet
Ndërsa Universiteti i Mjekësisë dhe degë të tjera elitare si Arkitektura në Universitetin e Tiranës kanë përfunduar regjistrimet pa kuota të lira, situata në universitetet e tjera është më problematike. Në total, në të gjitha universitetet publike llogariten rreth 370 kuota të paplotësuara, që përbëjnë afërsisht 5% të totalit.
Shumë ekspertë të arsimit paralajmërojnë se rënia e interesit për arsimin e lartë, veçanërisht për degët teknike dhe mjekësore, mund të sjellë pasoja afatgjata për tregun e punës dhe sistemin shëndetësor në vend.
Arsyet e kësaj rënieje janë të shumta. Emigracioni, pasiguritë ekonomike, mungesa e perspektivës profesionale në Shqipëri dhe kostot e larta të studimeve, sidomos në degë si Mjekësia, janë ndër faktorët më të përmendur nga vetë maturantët dhe ekspertët.
Megjithëse Mjekësia e Përgjithshme mbetet ende një ndër degët më të lakmuara, rënia drastike e aplikimeve për degët mjekësore tregon për një ndryshim të ndjeshëm të orientimit të të rinjve shqiptarë.
Sipas të dhënave zyrtare nga Rrjeti Akademik Shqiptar, në raundin e parë janë regjistruar rreth 80% e maturantëve që aplikuan për ndjekjen e studimeve të larta, një përqindje që reflekton përgjithësisht ulje të interesit krahasuar me vitet e kaluara.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
